Túrkııa balalardyń sýretin ǵalamtorǵa salýǵa tyıym saldy
ASTANA. 1 sáýir. QazAqparat - Baýyrlas eldiń otbasy isteri jáne áleýmettik saıasat jónindegi mınıstrligi balalardyń sýreti men beınejazbasyn ǵalamtorǵa salýǵa tyıym salatyn nusqaý berdi. Bul jaıynda timeturk.com habar taratty.
Osy vedomstvonyń basshysy Fatma Shahınniń aıtýynsha, sońǵy ýaqytta balalardyń fotosýreti men beınejazbalaryn zańsyz paıdalaný jáne óziniń aram oıyn júzege asyrý maqsatynda paıdalaný oqıǵalary kóptep tirkelgen. Bul balalar quqyǵy jónindegi konventsııaǵa qaıshy keledi.
muslim.kz saıtynyń jazýynsha, osyǵan baılanysty balalarmen jumys isteıtin memlekettik jáne jekemenshik balalar baqshalaryna, úıirmelerge jáne ózge de uıymdarǵa hat joldandy. Onda áleýmettik saıttardaǵy balalardyń fotosýretteri men beınejazbalaryn alyp tastaýǵa jáne budan bylaı ǵalamtorǵa salmaýǵa pármen berilgen.
Endi Túrkııada balalardyń fotosýretteri men beınejazbalaryn Facebook, Twitter jáne Youtube jelilerine ornalastyrý úshin ári balalar týraly aqparattardy engizý úshin atalmysh mınıstrliktiń arnaıy ruqsaty bolýy kerek.
Facebook-ty paıdalanýshylar sany jaǵynan Túrkııa Eýropada birinshi orynda, al álemde 6-shy orynda turǵanyn esterińizge sala ketkimiz keledi. Álemdegi eń tanymal áleýmettik jelini 32 mln adam paıdalanady eken. Atalmysh jelini túrikterdiń arasynda 18 ben 24 jas aralyǵyndaǵy jastar jıi paıdalanady. Bul derekti paıyzǵa shaǵyp, sanmen órnektesek: paıdalanýshylardyń 35%-y osy jas aralyǵyndaǵy jastar, ıaǵnı 10 mln. 311 myń 550 adam.
Al ekinshi orynda - 25 pen 35 jas aralyǵyndaǵylar - 28% nemese 8 mln 749 myń 194 adam. Úshinshi pozıtsııada - 35 pen 45 jas aralyǵyndaǵylar - 3 mln 749 myń 655 adam nemese 12%. 32 mln paıdalanýshynyń 63 paıyzy - erkek kindiktiler bolsa, 37% - áıelder juraǵaty.
