Túrkııa balalardyń áleýmettik jelilerge qoljetimdiligin qatań rettemek
ASTANA. KAZINFORM – Túrkııada 15 jasqa deıingi balalardyń áleýmettik jelilerdi paıdalanýyna shekteý qoıýǵa baǵyttalǵan jańa erejeler ázirlenip jatyr, dep habarlaıdy Anadolý.
Bul týraly eldiń otbasy jáne áleýmettik qyzmetter mınıstri Mahınýr Ózdemır Góktash agenttik uıymdastyrǵan dóńgelek ústel otyrysynda málimdedi.
Mınıstrdiń aıtýynsha, bastama tsıfrlyq dáýirde otbasy ınstıtýtyn qorǵaý jáne balalardyń qaýipsizdigin qamtamasyz etý maqsatynda qolǵa alynǵan. Qazirgi tańda balalardyń áleýmettik jelilerdi paıdalaný jasy 6-ǵa deıin tómendegen, al ekran aldynda ótkizetin ýaqyty turaqty túrde artyp keledi.
– Bir jaǵynan biz otbasylardyń tsıfrlyq saýattylyǵyn arttyrýǵa tyrysamyz. Biraq balalardy algorıtmderdiń, iri tehnologııalyq kompanııalardyń jáne tsıfrlyq platformalardyń yqpalynda qaldyrǵymyz kelmeıdi. Bul qurylymdar balalar arqyly úlken paıda tabady, – dedi Mahınýr Ózdemır Góktash.
Onyń sózinshe, balalar oıyn barysynda kóbine qarý-jaraqpen baılanysty agressıvti keıipkerlerdi tańdaıdy jáne keı jaǵdaıda ózin solarmen sáıkestendiredi. Bul úrdis alańdaýshylyq týǵyzady.
Josparlanǵan ózgeristerge sáıkes, áleýmettik jeli platformalary 15 jasqa deıingi paıdalanýshylar úshin mindetti jas tekserý júıesin engizýge tıis. Sonymen qatar Túrkııada 1 mıllıonnan astam qoldanýshysy bar platformalar el aýmaǵynda resmı ókil taǵaıyndaýy qajet.
Taǵy bir talap – balalarǵa zııan nemese orynsyz kontent bir saǵat ishinde joıylýy tıis. Budan bólek, jańartylatyn zańnamaǵa alǵash ret oıyn platformalary engiziledi. Eger olardyń aýdıtorııasy 100 myń qoldanýshydan assa, olar da Túrkııada ókildik ashýǵa mindetteledi.
Mınıstrdiń aıtýynsha, jańa talaptardy oryndamaǵan kompanııalarǵa qatysty sanktsııalar qarastyrylady. Sondaı-aq jalǵan jarnamaǵa qarsy kúres kúsheıtilip, ata-analyq baqylaý quraldary jetildiriledi.
Mahınýr Ózdemır Góktash bul bastamanyń basty maqsaty shekteý qoıý emes, qaýipsiz tsıfrlyq orta qalyptastyrý ekenin atap ótti.
– Biz balalardyń tsıfrlyq keńistikte erkin ári qaýipsiz bolýyn qalaımyz. Sonymen birge táýeldiliktiń aldyn alýdy kózdeımiz, – dedi mınıstr.
Ol Túrkııanyń bul baǵytta halyqaralyq tájirıbeni eskerip otyrǵanyn aıtty. Atap aıtqanda, uqsas sharalar Eýropalyq odaq elderinde, Avstralııada, Frantsııa men Ispanııada engizilip jatyr.
Mınıstrdiń málimetinshe, Túrkııa jaqynda balalardy tsıfrlyq ortada qorǵaý máselesine arnalǵan halyqaralyq sammıt ótkizip, ıÝNISEF uıymymen birlesken deklaratsııa qabyldaǵan.
– Tehnologııalardyń qarqyndy damýy jaǵdaıynda bul máseleni birde-bir el jeke sheshe almaıdy. Sondyqtan halyqaralyq yntymaqtastyq asa mańyzdy, – dedi ol.
Aıta keteıik, jańa retteý tetikteri balalardyń tsıfrlyq izderi men bolashaqtaǵy quqyqtyq táýekelderin azaıtýǵa da baǵyttalǵan.
Buǵan deıin Túrkııa mektep qaýipsizdigi úshin jasandy ıntellekt júıesin engizgeni málim boldy.
