Túrkııa azamatynyń basqarýymen Aqtaý portynan 20 mlrd.-tan astam teńgeniń metall synyqtary shyǵaryldy - Qarjy polıtsııasy
ASTANA. 28 qarasha. QazAqparat - Mańǵystaý oblysy boıynsha qarjy polıtsııasy departamentiniń qyzmetkerleri
Túrkııa azamaty Odjal Hýseın basqarǵan jáne quramynda elimizdiń birqatar azamaty bar Aqtaý teńiz porty arqyly birneshe jyl qara metaldardyń synyǵy men qaldyqtaryn asa iri mólsherde ekonomıkalyq kontrabanda jasaýmen aınalysyp kelgen uıymdasqan qylmystyq toptyń qyzmetin áshkereledi. Bul týraly Ekonomıkalyq qylmysqa jáne sybaılas jemqorlyqqa qarsy kúres agenttiginiń baspasóz qyzmetinen málim etti.
Qazaqstan Respýblıkasy Úkimetiniń 2007 jylǵy 28 jeltqsandaǵy «Qazaqstan Respýblıkasynyń syrtqy ekonomıkalyq qyzmetiniń Kedendik tarıfi jáne Taýarlyq nomenklatýrasy týraly» qaýlysyna sáıkes eksportqa shyǵarylatyn qara metaldardyń synyǵy men qaldyqtarynyń 1 tonnasy úshin 20 evrodan az emes kedendik alymdar alynady. Sonymen birge Eýropalyq odaqqa múshe elderdiń aýmaǵyna eksporttalatyn atalǵan taýarlar úshin alymdar salynbaıdy.
Osyny biletin «Aktaý Eksport Metall» JShS quryltaıshysy Odjal H. jáne bul kásiporynnyń dırektory Lıpchanskıı A. «Morport» kedendik beketi arqyly, sondaı-aq ıesi J.Abylǵazın bolyp tabylatyn «AktauTransPort» JShS brokerlik fırmasynyń jáne «TransEnergyServis» JShS espedıtorlik kompanııalarynyń kómegimen jalǵan kedendik jáne qosarlama qujattaryn paıdalanyp Túrkııaǵa qara metaldardyń synyǵy men qaldyqtaryn zańsyz shyǵaryp otyrǵan. Ol qujattarda taýardy alýshylar retinde Brıtandyq-Vırgın araldarynda tirkelgen «SAGA CARGO LLP» nemese «EUROSCRAP FOREIGN TRADE LTD» kompanııalary, al túsirý jeri retinde Gretsııadaǵy «Pereı» porty kórsetilgen.
Shyn máninde júk jalǵan qujattar boıynsha Túrkııadaǵy «Kroman» portynda túsirilgen.
Aldyn-ala sanaý boıynsha 2008-2012 jyldar aralyǵynda Aktaý Eksport Metall» JShS Túrkııaǵa kontrabandalyq jolmen quny 20 mlrd.teńgeden astam 576 myń tonna metall synyǵy shyǵarylǵan.
Oǵan qosa «Aktaý Eksport Metall» JShS-ne 2010-2012 jyldar aralyǵynda bıýdjetten 127 mln.teńge qosymsha qun salyǵy zańsyz keri qaıtarylǵan.
«Ýlýz Brız» kemesin, aıyptalýshylardyń keńseleri men turǵyn jaılaryn tintý barysynda bir júktiń eki baǵytqa, ıaǵnı, Túrkııadaǵy Kroman porty men Gretsııadaǵy Pereı portyna shyǵarý týraly birdeı qujattar, Gretsııadaǵy atalǵan porttyń móri jáne t.b. tabyldy.
Aǵymdaǵy jylǵy 12 qarashada «Aktaý Eksport Metall» JShS quryltaıshysy Odjalǵa, atalǵan fırmanyń dırektory Lıpchanskııge, «TransEnergyServis» jáne «AktauTransPort» JShS-riniń ıesi Abylǵazınge jáne «AktauTransPort» JShS dırektory Salıhovqa uıymdasqan qylmystyq top quramynda ekonomıkalyq kontrabanda jasaý faktisi boıynsha qylmystyq is qozǵaldy.
Osy kúni atalǵan tulǵalar ustalyp, Aqtaý qalasy ІІB ýaqytsha qstaý ızolıatoryna qamaldy.
16 qarashada Odjal, Lıpchanskıı jáne Abylǵazın sot sanktsııasymen qamaýǵa, al Salıhov úı qamaýyna alyndy.
Búgingi kúni uıymdasqan qylmystyq toptyń ózge de qatysýshylary anyqtalýda.
Oǵan qosa qylmystyq isti tergeý barysynda Mańǵystaý oblysynyń quqyqqorǵaý organdary laýazymdy tulǵalarynyń atalǵan tulǵalar tobynyń qylmystyq qyzmetine qamqorshylyq jasaý faktilerge qatystylǵy tekserilýde.
Ózge aqparat tergeý múddesine baılanysty jarııalanbaıdy.
