Túrkııa azamattaryna Qazaqstan aýmaǵynda 90 kúnge deıin vızasyz júrýge ruqsat berildi
ANKARA. KAZINFORM – Qazaqstan-Túrkııa Joǵary deńgeıdegi strategııalyq yntymaqtastyq keńesiniń 5-shi otyrysynda taraptar qorǵanys ónerkásibi, aqparattyq tehnologııa, jasandy ıntellekt, qarjy, azamattyq avıatsııa, mádenıet, bilim, densaýlyq saqtaý jáne týrızm salalaryndaǵy yntymaqtastyq perspektıvasy jóninde egjeı-tegjeı pikir almasty.
Atap aıtar bolsaq, ásirese eki eldiń bilim baǵytyndaǵy qatynastarynyń tamyry tereńde jatyr. Aldaǵy ýaqytta Astana men Almaty qalalarynda «Maarıf» qorynyń eki mektebi, sondaı-aq Túrkııanyń úzdik oqý oryndarynyń fılıaldary ashylmaq.
Memleket basshysynyń tapsyrmasymen Túrkııanyń jer silkinisi bolǵan Gazıantep provıntsııasynda byltyr jeltoqsanda jańa mektep qurylysy bastaldy. Bilim berý oshaǵy kelesi jyly paıdalanýǵa beriledi.
Budan bólek, týrızm salasyndaǵy oń úrdisti qoldaý, sondaı-aq san qyrly ekijaqty baılanystardy ilgeriletý úshin Túrkııa azamattaryna Qazaqstan aýmaǵynda 90 kúnge deıin vızasyz júrýge ruqsat berý týraly sheshim qabyldandy.
Qazaqstan delegatsııasyna iltıpat bildirgen Rejep Taııp Erdoǵan Qasym-Jomart Toqaevqa «Ekinshi otanyńyzǵa qosh keldińiz» dep erekshe qurmet kórsetti. Sondaı-aq qazaqtyń uly aqyny, oıshyl, kemeńger Abaı Qunanbaıulynyń dúnıege kelgenine 180 jyl tolýymen quttyqtady.
– Biz Qazaqstanmen aradaǵy yntymaqtastyqqa erekshe mán beremiz. Búginde eki el arasyndaǵy baılanystar strategııalyq seriktestik deńgeıine kóterildi. Osy oń serpindi saýda-sattyq, qorǵanys ónerkásibi, aýyl sharýashylyǵy, týrızm jáne mádenıet salalarynda odan ári tereńdetýdi maqsat etip otyrmyz. Qazaqstan – atamekenimizdegi eń iri saýda seriktesimiz. Saýda aınalymyn 15 mıllıard dollarǵa jetkizý úshin jumysymyzdy jalǵastyramyz, - dedi Túrkııa Prezıdenti.
Keńes otyrysynda Qazaqstan tarapynan Premer-mınıstrdiń orynbasary – Ulttyq ekonomıka mınıstri Serik Jumanǵarın, Kólik mınıstri Nurlan Saýranbaev, Túrkııa tarapynan Syrtqy ister mınıstri Hakan Fıdan baıandama jasady.
Buǵan deıin habarlanǵandaı, Qasym-Jomart Toqaev pen Rejep Taııp Erdoǵan Qazaqstan-Túrkııa Joǵary deńgeıdegi strategııalyq yntymaqtastyq keńesiniń 5-shi otyrysyn ótkizdi.