Túrkııa Aıǵa ushatyn apparatyn ázirleýdi aıaqtady
ASTANA. KAZINFORM – Túrkııanyń ǵarysh apparatyn 2027 jyldyń basynda ushyrý josparlanyp otyr, dep habarlaıdy Kazinform agenttiginiń Ankaradaǵy menshikti tilshisi.
Túrkııanyń «Deılı Sabah» basylymy jazǵandaı, el óziniń alǵashqy Aı mıssııasyna arnalǵan ǵarysh apparatyn óndirý, qurastyrý jáne biriktirý jumystaryn aıaqtady. Qazir apparat TUSAŞ aeroǵarysh kompanııasynyń ǵarysh júıelerin biriktirý jáne synaý ortalyǵynda júıelik synaqtan ótip jatyr.
Massasy shamamen 3,5 tonna bolatyn apparat eki aıǵa jýyq ýaqyt ishinde Aı betinen shamamen 100 shaqyrym bıiktiktegi sheńberlik polıarlyq orbıtaǵa shyǵýy tıis. Onyń keminde úsh aı jumys isteýi josparlanǵan. Al mindetter sátti oryndalǵan jaǵdaıda mıssııa merzimi 18 aıǵa deıin uzartylýy múmkin.
Negizgi baǵdarlama aıasynda Kún jelin, Aıdyń magnıt órisi men jylýlyq sıpattamalaryn, sondaı-aq onyń betinde sýdyń túzilý úderisterin zertteý kózdelgen. Ǵylymı jumystar aıaqtalǵannan keıin apparatty basqarylatyn tómendeý arqyly Aıdyń betine qaraı baǵyttaý josparlanyp otyr.
Apparattyń 80 paıyzdan astamy otandyq tehnologııalardy paıdalana otyryp óndirilgen. Negizgi komponentterdiń biri Túrkııada ázirlengen gıbrıdti qozǵaltqysh júıesi bolady.
Synaqtar aıaqtalǵannan keıin apparat ushyrýǵa daıyndyq jumystaryn júrgizý úshin AQSh-qa jiberiledi. Ony Kennedı atyndaǵy ǵarysh aılaǵynan ushyrý josparlanǵan.
Buǵan deıin gıbrıdti qozǵaltqyshy bar álemdegi alǵashqy jerserikti Túrkııa orbıtaǵa shyǵarǵany habarlanǵan bolatyn.
Aıta ketelik Túrkııada aıaq kıim óndirisi úsh jylda 41,6 paıyzǵa azaıdy.
