Túrkııa aýyl sharýashylyǵyn jańǵyrtýǵa taǵy 757 mln eýro tartady

ASTANA. KAZINFORM — Túrkııa sýarý júıesin jańǵyrtý úshin Dúnıejúzilik bankten 1 mıllıard eýrodan astam qarajat tartty, dep habarlaıdy Kazinform agenttiginiń menshikti tilshisi.

Túrkııa Qazyna jáne qarjy mınıstrligi «Sýlandyrýdy jańǵyrtý — 2» ulttyq jobasynyń ekinshi kezeńi aıasynda Dúnıejúzilik bankpen 757,1 mln eýro kóleminde nesıe bólý týraly jańa kelisimge qol qoıdy.

Bul qarajat eldiń agrarlyq óńirlerindegi sý taratý júıelerin jetildirýge, sý resýrstaryn paıdalanýdyń tıimdiligin arttyrýǵa jáne aýyl sharýashylyǵyn sýlandyrýdy jańǵyrtýdyń uzaqmerzimdi baǵdarlamasyn ázirleýge baǵyttalmaq.

Jobany Túrkııanyń Memlekettik sý resýrstary basqarmasy júzege asyrady. Ol buǵan deıin 317 mln eýrodan astam qarjy bólingen birinshi kezeńniń jalǵasy sanalady.

Osylaısha, Túrkııanyń sýarý júıelerin jańǵyrtýǵa Dúnıejúzilik bankten tartqan qarjysynyń jalpy kólemi 1 mlrd eýrodan asty.

Sýlandyrý ınfraqurylymyn jańǵyrtý — klımattyq qaýipterdiń artýy, agroónerkásiptik keshenniń suranysynyń ósýi jáne sý resýrstaryn utymdy paıdalaný qajettiligi jaǵdaıynda Túrkııa úkimeti úshin basty mindetterdiń biri sanalady.

Joba aýyl sharýashylyǵy ónimdiligin arttyryp qana qoımaı, aýyldyq aýmaqtardyń turaqty damýyna úles qosady dep kútilýde.

Dúnıejúzilik bankpen yntymaqtastyq Túrkııa úshin sý resýrstarynyń ekonomıkalyq ósý jolyndaǵy strategııalyq mańyzyn kórsetedi jáne Ankaranyń ınfraqurylymdyq júıeli máselelerdi sheshý úshin halyqaralyq qarjylandyrý tartýǵa múddeliligin aıǵaqtaıdy.

Buǵan deıin biz klımattyń eleýli ózgerýi men sý qoımalarynyń tartylýyna baılanysty Túrkııa mamandary azamattardyń sýǵa uqypty qaraýyna baǵyttalǵan aqparattyq naýqandar ótkizýdi josparlap otyrǵanyn habarlaǵanbyz.

Sonymen qatar, Túrkııada rekordtyq aıaz aýyl sharýashylyǵyna keri áserin tıgizdi. Bıylǵy sáýir aıynda el sońǵy onjyldyqtaǵy eń qatty sýyqqa tap boldy.

Aıta ketelik Túrkııada qarjylyq qıyndyqtar «Akkýıý» AES-niń jańa bloktaryn salý qarqynyn báseńdetti.