Túrkııa áýejaılarynda drondardy ustaý úshin qyrǵyz qyrandaryn paıdalanýdy josparlap otyr
ASTANA. QazAqparat - Túrkııa áýejaılarynda drondardy ustaý úshin qyrǵyz qyrandaryn paıdalanýdy josparlap otyr. Bul týraly «Haberler» túrik aqparat agenttigine silteme jasap KırTAG habarlady.
Túrkııa áýejaılarynyń memlekettik ákimshiliginiń bas dırektory Serdar Hýseın Iyldyrym atap ótkendeı, sońǵy kezderi drondar sııaqty ushqyshsyz obektiler problemaǵa aınaldy.
«Amsterdam áýejaıynda Shıphol drondarmen kúresý úshin qyrandardy belsendi túrde paıdalanady», - dedi ol.
«Qyrǵyzstanda ǵasyrlar boıy ań aýlaýda qyrandardy paıdalanady. Múmkin qustardy sol jaqtan ákeletin shyǵarmyz», - dedi Serdar Hýseın Iyldyrym.
Eske sala ketsek, brıtandyq kompanııa Openworks Engineering zań buzǵan drondardy aýlaıtyn pnevma zeńbirek jasap shyqty. Qurylǵy parashıýty bar aý atady jáne drondy búldirmeı jerge túsiredi.
