Túrkııa áýejaılarynda COVİD-19 testileý ortalyqtary ashylady

ANKARA. Anadoly-QazAqparat – 2020 jyldyń 1 shildesinde Túrkııanyń barlyq iri áýejaılarynda koronavırýs ınfektsııasyn anyqtaıtyn test-ortalyqtar ashylady, qalǵan áýe aılaqtarynda mundaı nysandar 15 shildeden bastap jumys istemek, dep habarlaıdy QazAqparat Anadoly agenttigine silteme jasap.

Bul týraly Túrkııa mádenıet jáne týrızm mınıstri Mehmet Nýrı Ersoı «Anadoly» agenttigi redaktorlarynyń dóńgelek ústelinde málim etti.

Mınıstrdiń aıtýynsha, pandemııa kezinde el turǵyndary men qonaqtarynyń densaýlyǵyn qorǵaýǵa erekshe mán beriledi.

«Qaýipsiz týrızm» sertıfıkatyn alýǵa 727 qonaqúı men 900 meıramhana ótinish jasady, dep atap ótti mádenıet mınıstri.

«Túrkııa COVID-19-dan qorǵaný sharalary sheńberinde eýropalyq deńgeıdegi sertıfıkattalǵan obektilerdiń sany boıynsha eń qaýipsiz el», - dedi ol.

Túrkııa týrızm mınıstri pandemııanyń eldiń týrıstik ındýstrııasy maqsatyna kedergi keltirmegenin atap ótti.

«2023 jyly Túrkııada týrıster sany - 75 mln adamǵa jetip, týrızm salasynan túsetin tabys – 65 mıllıardty quraýy tıis. Biz pandemııadan keıin týrızm salasy tez qalpyna keledi dep úmittenip otyrmyz», - dedi mınıstr.