Túrkııa áýe tasymaly boıynsha tarıhı rekordty jańartty
ASTANA. KAZINFORM — 2025 jyly Túrkııa áýejaılary rekordtyq 247,2 mln jolaýshyǵa qyzmet kórsetti. Bul respýblıka tarıhyndaǵy eń joǵary kórsetkish, dep habarlaıdy Kazinform agenttiginiń menshikti tilshisi.
Ósim ishki jáne halyqaralyq baǵyttardyń ekeýinde de tirkeldi. 2025 jyldyń qorytyndysy boıynsha áýe kóligin paıdalanǵan jolaýshylar sany 247,2 mln adam, bul 2024 jylmen salystyrǵanda 7 paıyzdan astamǵa artyq.
Ásirese jeltoqsan aıy qarqyndy boldy: bir aıdyń ishinde jolaýshylar aǵyny 17,5 mln adamnan asty, al jalpy áýe qozǵalysy jyldyq mánde 11 paıyzdan asa ósti.
Іshki baǵyttarda bir jylda 101 mln-nan astam jolaýshy tasymaldansa, halyqaralyq reısterde shamamen 145 mln adam qyzmet aldy. Sonymen qatar júk tasymaly kólemi de artty: Túrkııa áýejaılary arqyly 5 mln tonnadan astam júk ótti.
Negizgi júkteme dástúrli túrde Ystanbulǵa tústi. Qalanyń jańa áýejaıy shamamen 84,5 mln jolaýshyǵa qyzmet kórsetse, Sabıha Gókchen áýejaıy óz tarıhynda alǵash ret 48 mln jolaýshy mejesinen asty.
Kýrorttyq óńirler de joǵary kórsetkish kórsetti. Týrıstik qalalardyń áýejaılary shamamen 63 mln jolaýshyny qabyldady. Bul baǵytta taǵy da Antalıa kósh bastady — jyl ishinde 39 mln-nan astam adam.
Buǵan deıin Túrkııa astanasynda Etımesgýt áskerı aerodromyn aýqymdy jańǵyrtý bastalǵany habarlanǵan bolatyn.
Ol 2026 jylǵy shildede ótetin NATO sammıtine deıin eldiń basty VIP jáne memlekettik áýejaıyna aınalmaq.