Túrkııa ASTRALINK áskerı spýtnıktik jelisin damytyp jatyr
ASTANA. KAZINFORM — Bul spýtnıktik baılanys negizinen tómen orbıtadaǵy spýtnıkter arqyly qorǵalǵan áskerı baılanys ornatýǵa baǵyttalǵan, dep habarlaıdy Kazinform agenttiginiń Ankaradaǵy menshikti tilshisi.
Túrkııanyń qorǵanys ónerkásibi kompanııasy ASELSAN áskerı baılanysqa arnalǵan Jerge jaqyn tómen orbıtadaǵy (LEO) spýtnıkter jelisin qurýdy kózdeıtin ASTRALINK jańa jobasyn tanystyrdy. Joba tanystyrylymy 5-9 qazan aralyǵynda Antalıada ótip jatqan Halyqaralyq astronavtıka kongresine (IAC 2026) oraılastyryldy.
Ázirleýshilerdiń josparyna sáıkes, ASTRALINK spýtnıktik baılanysty áskerı 5G/6G jelilerimen biriktirip, jerústi ınfraqurylymy joq nemese shekteýli aımaqtarda qorǵalǵan ári turaqty baılanys ornatýdy qamtamasyz etýi tıis. Joba ASELSAN men Túrkııanyń Qorǵanys ónerkásibi basqarmasy 2026 jylǵy mamyrda kelisimshart jasasqan aýqymdy GÖKBAĞI baǵdarlamasy aıasynda júzege asyrylyp jatyr.
ASTRALINK qurylymy belgili bir deńgeıde Starlink júıesine uqsaıdy, óıtkeni ol birtutas jelige biriktirilgen kóptegen tómen orbıtalyq spýtnıkti paıdalanýdy kózdeıdi. Sonymen qatar bul joba halyqqa arnalǵan kommertsııalyq spýtnıktik ınternet qyzmetin qurýdy kózdemeıdi. Júıeniń negizgi maqsaty – áskerı bólimderdi, basqarý ortalyqtaryn jáne basqa da paıdalanýshylardy, sonyń ishinde shalǵaı aýdandarda jáne jerústi jelileri bolmaǵan jaǵdaıda, qorǵalǵan baılanyspen qamtamasyz etý.
Fýnktsıonaldyq maqsaty jaǵynan túrkııalyq joba memlekettik jáne ulttyq qorǵanys mindetterine arnalǵan SpaceX kompanııasynyń amerıkalyq Starshield júıesine kóbirek uqsaıdy. Bul rette ASELSAN spýtnıktik quramdas bólikti, jerústi ınfraqurylymdy, termınaldar men áskerı baılanys tehnologııalaryn ulttyq baqylaýda bolatyn biryńǵaı júıege biriktirýge umtylyp otyr.
Buǵan deıin Túrkııa Aıǵa ushý mıssııasyna arnalǵan apparatty ázirleýdi aıaqtaǵany habarlanǵan bolatyn. Túrkııanyń ǵarysh apparatyn 2027 jyldyń basynda ushyrý josparlanyp otyr.
