Túrkııa Antalııa dıplomatııalyq forýmyna daıyndalyp jatyr
ASTANA. KAZINFORM – Erteń Túrkııada Antalııa dıplomatııalyq forýmy jumysyn bastaıdy. Osymen besinshi márte ótetin úsh kúndik halyqaralyq is-shara «Bolashaqty josparlaý, belgisizdikti basqarý» taqyrybyna arnalyp otyr.
ADF2026 forýmynda bas qosatyn álem kóshbasshylary, saıasatkerler men dıplomattar, ǵalymdar men bıznes salasynyń sarapshylary belgisizdikti basqarýdyń tıimdi joldaryn qarastyryp, aldaǵy syn-qaterlerge daıyndyq barysynda týyndaıtyn ózekti máselelerdi sheshý tásilderin talqylamaq.
Antalııa dıplomatııalyq forýmy – dıplomatııamen aınalysatyn saıası kóshbasshylar, dıplomattar, qoǵamdyq pikir lıderleri men ǵalymdar sııaqty joǵary deńgeıdegi kásibı mamandardyń kezdesýi. Bul forým dıplomatııa, saıasat jáne bıznes salalaryndaǵy óńirlik jáne jahandyq qatysýshylar úshin ıdeıa almasýǵa jáne halyqaralyq máselelerdi sheshýge arnalǵan biregeı alań sanalady.
Aıta keteıik, kúni keshe Aqorda Túrkııa Vıtse-prezıdenti Djevdet Iylmazdy qabyldaǵan Memleket basshysy Qasym-Jomart Toqaev baýyrlas eldiń aımaqtaǵy turaqtylyqty qamtamasyz etýdegi rólin joǵary baǵalap, aldaǵy Antalııa dıplomatııalyq forýmyna qatysatynyn rastaǵan edi.
