Túrkııa alǵashqy ulttyq súńgýir qaıyǵyn jasandy ıntellektpen jabdyqtaıdy
ASTANA.KAZINFORM — Túrkııa óz óndirisindegi alǵashqy súńgýir qaıyǵyn jasandy ıntellekt tehnologııalaryna negizdelgen jaýyngerlik basqarý júıesimen jabdyqtaýdy josparlap otyr. Bul týraly Kazinform agenttiginiń Ankaradaǵy menshikti tilshisi habarlady.
Túrkııanyń MILDEN ulttyq súńgýir qaıyq jobasy aıasynda jasalyp jatqan alǵashqy sýasty kemesine zamanaýı basqarý júıeleri ornatylady. Jańa tehnologııa súńgýir qaıyqtaǵy sensorlar men qarý-jaraqtan keletin aqparatty bir júıege biriktirip, tapsyrmany oryndaý barysynda qorshaǵan orta jaǵdaıy men barlaý málimetterin de eskerýge múmkindik beredi.
Qazir ázirleýshiler súńgýir qaıyqtyń qozǵalysyn basqarý júıesi boıynsha jumys bastap, ekıpaj múshelerin daıarlaýǵa arnalǵan arnaıy trenajer jasa jatyr.
Jaýyngerlik basqarý júıesi Túrkııada óndiriletin otandyq qarý-jaraqpen, sonyń ishinde torpedalar men sýasty qanatty zymyrandarmen biriktiriledi. Sonymen qatar súńgýir qaıyqtyń ártúrli júıeleri arasynda aqparat almasýdy jáne olardy qashyqtan basqarýdy qamtamasyz etetin biryńǵaı aqparattyq júıe qurý josparlanyp otyr.
Sonymen qatar Túrkııada sý betinde de, sý astynda da jumys isteı alatyn gıbrıdti ushqyshsyz sýasty apparatynyń ázirlemesi aıaqtalýǵa jaqyn. Taǵy bir joba spýtnıktik navıgatsııasyz jumys isteıtin sensorlar arqyly sý astyndaǵy nysandardyń ornalasýyn anyqtaýǵa, úsh ólshemdi kartalar jasaýǵa jáne sýasty qurylystaryn zertteýge baǵyttalǵan.
Ázirleýshilerdiń aıtýynsha, bul tehnologııalar bolashaqta Túrkııanyń sýasty operatsııalary salasyndaǵy múmkindikterin edáýir keńeıtýge jol ashady. Atap aıtqanda, olar barlaý júrgizý, teńiz mınalaryna qarsy operatsııalar uıymdastyrý jáne teńiz túbin baqylaý sııaqty mindetterde qoldanylýy múmkin.
Buǵan deıin Túrkııa 2026–2030 jyldarǵa arnalǵan jasandy ıntellekt salasyndaǵy jańa is-qımyl josparyn bekitkeni habarlanǵan bolatyn.
