Túrkııa áleýmettik jelilerdegi qylmysqa qarsy baqylaýdy kúsheıtedi
ASTANA. KAZINFORM- Túrkııa bıligi áleýmettik jelilerdegi qylmystyq áreketter men jalǵan aqparattyń taralýyna qarsy kúresti kúsheıtip jatyr, dep habarlaıdy Kazinform agenttiginiń Ankaradaǵy menshikti tilshisi.
Túrkııanyń Ádilet mınıstri Akyn Gıýrlek áleýmettik jeliler jazasyz zańsyz áreket jasaýǵa múmkindik beretin keńistikke aınalmaýy kerektigin málimdedi.
Onyń aıtýynsha, quqyq qorǵaý organdary zańsyz tabys kózderin jasyrýǵa jáne qylmystyq jolmen qarjylandyrylatyn ómir saltyn kórsetýge baılanysty jarııalanymdardy tekserip jatyr.
Bul málimdeme sán-saltanaty kóz tartatyn úılený toıynyń vıdeosyn jarııalap, jurt nazaryn aýdarǵan er adamnyń ustalýynan keıin jasaldy. Tergeý barysynda onyń aqsha jylystatýǵa qatysy bary anyqtalǵan.
Daily Sabah basylymynyń jazýynsha, Túrkııa bıligi áleýmettik jeliler men messendjerlerdi paıdalanatyn uıymdasqan qylmysqa qarsy kúresti de kúsheıtip jatyr. Kámeletke tolmaǵandardy tez aqsha tabýǵa ýáde berip, qylmystyq áreketke tartatyn toptarǵa erekshe nazar aýdarylady. Bıyl shildede búkil el boıynsha júrgizilgen operatsııa barysynda uıymdasqan qylmystyq toptardyń qyzmetin nasıhattaıtyn akkaýnttarǵa qatysy bar 216 kúdikti ustaldy.
Sonymen qatar sońǵy eki aıda Túrkııada lańkestik úgit-nasıhat, jalǵan aqparat jáne arandatýshylyq sıpattaǵy kontent taratqan 2034 akkaýntqa qoljetimdilik shekteldi.
Túrkııanyń vıtse-prezıdenti Djevdet Iylmaz óz kezeginde ınternettegi zańsyz bás tigý men qumar oıyndarǵa baılanysty qaýip-qaterdiń artyp kele jatqanyn atap ótti. Onyń aıtýynsha, tsıfrlyq platformalar men jańa tólem tásilderiniń damýy mundaı qyzmettiń tezirek taralýyna, aýdıtorııasynyń keńeıýine jáne transshekaralyq sıpat alýyna múmkindik beredi.
Osyǵan baılanysty mundaı qaýip-qaterlerge qarsy is-qımyl quqyq qorǵaý organdarynyń, qarjy qurylymdarynyń, densaýlyq saqtaý jáne bilim berý júıeleriniń, sondaı-aq kommýnıkatsııa salasyndaǵy memlekettik organdardyń úılesimdi jumysyn talap etedi.
Buǵan deıin Túrkııada mektepterge oqýshylardyń sýretin ınternette jarııalaýǵa tyıym salynǵany týraly jazdyq.
