Túrkııa aldaǵy 10 jylda elektr energııasyn tutynýdy 50 paıyzǵa arttyrmaq
ASTANA. KAZINFORM — Túrkııa prezıdenti Rejep Taııp Erdoǵan eldiń 2053 jylǵa qaraı kómirtegi beıtaraptyǵyna qol jetkizýdi maqsat etip otyrǵanyn málimdedi. Osy jospar aıasynda elde jańartylatyn energııa kózderin damytýǵa jáne atom elektr stantsııalarynyń sanyn arttyrýǵa basymdyq berilmek. Bul týraly ol Antalıada ótken COP31 klımattyq konferentsııasy aıasyndaǵy bıznes-forýmda aıtty.
Damyǵan elderge úndeý
Erdoǵannyń aıtýynsha, jahandyq kómirtegi bıýdjetiniń negizgi bóligin paıdalanyp qoıǵan damyǵan memleketter parnıktik gazdar shyǵaryndylaryn azaıtý men klımattyq sharalardy qarjylandyrýǵa kóbirek jaýapkershilik alýy kerek.
Ol klımattyń ózgerýinen eń kóp zardap shegip otyrǵan damýshy elderge qoldaý kórsetýdiń mańyzyn atap ótti. Sondaı-aq klımattyq daǵdaryspen kúreste tek memleketter ǵana emes, bıznes ókilderi de belsendilik tanytýy qajet ekenin aıtty.
Túrkııa energetıkany jańǵyrtady
Túrkııa prezıdenti eldiń jasyl ekonomıkaǵa kóshý baǵytyn jalǵastyratynyn jetkizdi. Bul rette energetıka, ónerkásip, kólik, aýyl sharýashylyǵy jáne qurylys salalaryn qaıta jańǵyrtý kózdelip otyr.
«Bizdiń basty maqsatymyz – klımattyń ózgerýimen kúrese otyryp, ónerkásiptiń básekege qabilettiligin arttyrý», – dedi Erdoǵan.
Onyń aıtýynsha, Túrkııa jel, kún jáne sý energetıkasyna ınvestıtsııa salýdy jalǵastyryp, atom elektr stantsııalarynyń sanyn da kóbeıtedi.
Elektr energııasyn tutyný 50 paıyzǵa artýy múmkin
Erdoǵan Túrkııanyń energetıkalyq resýrstar ımportyna jyl saıyn ondaǵan mıllıard dollar jumsaıtynyn atap ótti. Sondyqtan el óz resýrstaryn barynsha tıimdi paıdalanýǵa nıetti.
Prezıdenttiń málimdeýinshe, aldaǵy 10 jylda Túrkııa elektr energııasyn tutyný kólemin keminde 50 paıyzǵa arttyrýdy josparlap otyr.
Klımattyq saıasattyń jańa jospary
Túrkııa 2021 jyly Jasyl kelisim boıynsha is-qımyl josparyn ázirlegen. Qujat memlekettik organdar men jeke sektordyń qatysýymen ekologııalyq transformatsııanyń negizgi baǵyttaryn aıqyndaıdy.
Erdoǵannyń aıtýynsha, bul jospar jańartylyp, 2026–2030 jyldarǵa arnalǵan jańa kezeńdi qamtyǵan.
Túrkııaǵa 5,1 mlrd dollar ınvestıtsııa tartylady
Forým barysynda tórt iri damý bankimen jalpy somasy 5,1 mlrd dollar bolatyn 10 kelisimge qol qoıylǵan.
Prezıdenttiń sózinshe, qarajat aýyl sharýashylyǵyn, eksporttaýshylardy, shaǵyn jáne orta bıznesti, sondaı-aq eldiń damý jobalaryn qoldaýǵa baǵyttalady.
Erdoǵan halyqaralyq ınvestorlar men qarjy ınstıtýttarynyń Túrkııaǵa degen senimi artyp kele jatqanyn da atap ótti.
Aıta keteıik, Túrkııa BUU-nyń COP31 klımattyq konferentsııasyn alǵash ret ótkizip otyr.
