Túrkııa «Akkýıý» AES alǵashqy reaktoryn iske qosýǵa daıyndalyp jatyr
ASTANA. KAZINFORM — Túrkııa tarıhyndaǵy alǵashqy atom elektr stantsııasy «Akkýıýdyń» birinshi energetıkalyq blogy aıaqtalýǵa jaqyn, dep habarlaıdy Kazinform menshikti tilshisi.
Belgili bolǵandaı, el bıligi atom stantsııasy elektr energııasyn 2026 jyldyń basynda óndire bastaıdy dep kútip otyr.
Túrkııanyń energetıka jáne tabıǵı resýrstar mınıstri Alparslan Baıraktardyń habarlaýynsha, «Akkýıý» AES birinshi energetıkalyq blogynyń daıyndyǵy 95%-ǵa jetti.
Onyń aıtýynsha, alǵashqy reaktordy iske qosý pandemııa saldarynan týyndaǵan kidiriske jáne jabdyq satyp alýdaǵy ártúrli qıyndyqtarǵa qaramastan bıyl josparlanǵan.
Qurylys jumystaryn aıaqtaý bastapqyda 2025 jyldyń sáýirine qaraı josparlanǵan edi, alaıda merzim ózgertildi. Mınıstr atap ótkendeı, qazirgi ýaqytta barlyq kúsh-jiger jumystyń sońǵy kezeńine jáne elektr qýatyn óndirýdi bastaý daıyndyǵyna baǵyttalǵan. Belgili bolǵandaı, joba Reseı jáne «Rosatom» memlekettik korporatsııasymen birlesip júzege asyrylyp otyr.
«Akkýıý» — Túrkııadaǵy alǵashqy atom elektr stantsııasy. Jobaǵa árqaısysynyń qýaty 1200 MVt bolatyn Reseıde jasalǵan 3+ býynyndaǵy VVER reaktorlary bar tórt energetıkalyq blok kiredi. Stantsııa álemdik atom salasynda alǵash ret qoldanylǵan «build-own-operate» («sal-ıe bol-paıdalan») modeli boıynsha salynyp otyr.
Baıraktar atom energetıkasynyń eldiń energetıkalyq júıesi úshin strategııalyq mańyzdylyǵyn atap ótti. Onyń baǵalaýynsha, «Akkýıý» AES-tiń 1200 MVt qýattylyqtaǵy bir reaktory shamamen 5000 MVt ornatylǵan qýattylyǵy bar kún elektr stantsııasyna teń, sebebi atom generatsııasy elektr energııasyn aýa raıy jaǵdaıyna qaramastan turaqty óndirýdi qamtamasyz etedi.
Bul rette Túrkııa jańartylatyn energııa kózderin belsendi túrde damytýdy jalǵastyrady. Bılik 2035 jylǵa qaraı jel jáne kún elektr stantsııalarynyń ornatylǵan qýatyn 120 GVt-qa deıin arttyrýdy josparlap otyr, bul jyl saıyn 8-9 GVt jańa qýatty iske qosýdy qajet etedi.
Osyǵan deıin Túrkııa geotermaldyq elektr stantsııalarynyń ornatylǵan qýaty boıynsha álemdegi úzdik bes eldiń qataryna engenin jáne jylý energııasyn tikeleı paıdalaný jaǵynan ekinshi orynǵa shyqqanyn jazǵan bolatynbyz.