Túrkııa akademııalarynda sırııalyq áskerı qyzmetkerlerdi oqytýdy bastady

ASTANA. KAZINFORM – Túrkııa sırııalyq áskerı qyzmetkerlerdi óz eliniń áskerı oqý oryndarynda oqytý baǵdarlamasyn iske qosty. Bul Ankara men Damask arasyndaǵy yntymaqtastyqtyń jańa kezeńi bolyp sanalady.

Túrkııa Qorǵanys mınıstrliginiń málimetinshe, sırııalyq áskerı qyzmetkerler Túrkııanyń qarýly kúshterine qarasty polıgondar men kazarmalarda daıyndyqtan ótýde. Sonymen qatar, 49 sırııalyq kýrsant qurlyq áskerleri, áskerı-áýe jáne áskerı-teńiz kúshteriniń akademııalarynda oqýǵa kiristi.

Baǵdarlama Túrkııa men Sırııa arasynda bıyl tamyzda qol qoıylǵan áskerı yntymaqtastyq jáne keńes berý jónindegi kelisim aıasynda júzege asyrylyp otyr. Qujatqa sáıkes, sırııalyq tarapqa qarý-jaraq pen áskerı tehnıka berilip, eldiń qorǵanys áleýetin arttyrý maqsatynda jeke quramdy daıarlaý kózdelgen.

Ankaranyń habarlaýynsha, bul oqý baǵdarlamasy Sırııa qarýly kúshteriniń áleýetin arttyrýǵa baǵyttalǵan. Oqytý aıaqtalǵannan keıin kýrsanttar óz elderine oralyp, ulttyq armııada qyzmetin jalǵastyrady.

Aımaqtyq buqaralyq aqparat quraldarynyń dereginshe, Túrkııa aldaǵy ýaqytta shamamen 5 myń sırııalyq áskerı men polıtsııa qyzmetkerin daıarlaýdy josparlap otyr, al uzaq merzimde bul kórsetkish 20 myń adamǵa deıin jetpek. Bul Sırııa armııasyn reformalaý jáne kórshi eldegi Túrkııa yqpalyn nyǵaıtý strategııasynyń bir bóligi bolyp sanalady.

Ótken jyldyń sońynda Bashar Asad rejımi qulaǵannan keıin Túrkııa Sırııanyń ýaqytsha prezıdenti Ahmad ash-Sharaa basqaryp otyrǵan jańa úkimettiń negizgi odaqtasyna aınaldy. Ankara Damaskke áskerı, saıası jáne dıplomatııalyq qoldaý kórsetip qana qoımaı, ınfraqurylymdy qalpyna keltirý jáne memlekettik ınstıtýttardy reformalaý isine de qatysyp otyr.

Sarapshylar Túrkııanyń sırııalyq áskerılerdi daıyndaýǵa belsene qatysýyn Ankaranyń Taıaý Shyǵystaǵy yqpalyn kúsheıtý nıetimen baılanystyrady.

Buǵan deıin habarlanǵandaı, Túrkııa men Sırııa áskerı yntymaqtastyq týraly memorandýmǵa qol qoıǵan bolatyn.