Túrkııa 2028 jylǵa qaraı ekonomıkalyq ósim men ınflıatsııa tómendeıtinin boljap otyr

ASTANA. KAZINFORM — Túrkııa úkimeti 2028 jylǵa deıingi kezeńdi qamtıtyn jańartylǵan orta merzimdi ekonomıkalyq boljamyn jarııalady, dep habarlaıdy Kazinform agenttiginiń menshikti tilshisi.

Túrkııa Vıtse-prezıdenti Djevdet Iylmazdyń málimdeýinshe, ulttyq valıýtaǵa qysym áli de saqtalǵanymen, eldiń negizgi makroekonomıkalyq kórsetkishteri birtindep jaqsara bastaıdy.

Inflıatsııa 2025 jyldyń sońynda 28,5% shamasynda bolady dep kútiledi. Al odan keıingi jyldary turaqty túrde tómendep, 2028 jyldyń sońyna qaraı 8%-ǵa deıin tómendeıdi dep boljanǵan. Vıtse-prezıdenttiń aıtýynsha, bul nátıjege qatań aqsha-nesıe saıasaty men qurylymdyq reformalardyń arqasynda qol jetkizýge bolady.

Ekonomıkalyq ósim de birtindep qarqyn almaq:

• 2026 jyly – 3,8%

• 2027 jyly – 4,3%

• 2028 jyly – 5%

Túrkııa úkimeti bul ósimdi óndiris sektorynyń kúsheıýi, eksport kóleminiń artýy jáne ınvestıtsııalyq ahýaldyń jaqsarýy esebinen qamtamasyz etpek.

Degenmen, sarapshylar ulttyq valıýta – túrik lırasy áli de álsireı beredi dep boljap otyr. Qazirdiń ózinde valıýtalyq naryqtaǵy jaǵdaı turaqsyz:

• Búginde 1 AQSh dollary shamamen 41,26 lıra tursa,

• 2028 jylǵa qaraı onyń 53,76 lıraǵa deıin qymbattaýy múmkin.

Aıta keteıik, Túrkııadaǵy eń iri banknot – 200 lıranyń quny qazirdiń ózinde 5 dollardan tómen túsip ketken.

Sonymen qatar, ekonomıkalyq turaqtandyrý aıasynda eńbek naryǵyndaǵy jaǵdaıdyń da jaqsaratyny kútilýde. Buǵan deıin eki tańbaly kórsetkishte turǵan jumyssyzdyq deńgeıi alǵash ret 8%-dan tómendep, 2028 jyly 7,8%-ǵa deıin túsedi dep boljanǵan. 

Bul boljam Túrkııanyń makroekonomıkalyq saıasatyn anyqtaıtyn orta merzimdi baǵdarlama (OVP) aıasynda jyl saıyn ázirlenetin strategııalyq jospardyń bir bóligi bolyp tabylady.

Jalpy alǵanda, eldegi áleýmettik-ekonomıkalyq jaǵdaı turaqty. Buǵan deıin Túrkııanyń Ortalyq bankiniń halyqaralyq rezervteri rekordtyq deńgeıge jetkeni týraly habarlanǵan bolatyn.