Túrkııa 2026–2030 jyldarǵa arnalǵan jasandy ıntellektini damytý josparyn bekitti
ASTANA. KAZINFORM — Túrkııa jasandy ıntellekt salasyn 2026–2030 jyldary damytýǵa arnalǵan jańa is-qımyl josparyn bekitti. Qujat tehnologııalardy, ınfraqurylymdy jáne kadrlyq áleýetti damytýǵa baǵyttalǵan, dep habarlaıdy Kazinform agenttiginiń Ankaradaǵy menshikti tilshisi.
Jospar Túrkııanyń Ónerkásip jáne tehnologııalar mınıstrliginiń úılestirýimen ázirlendi. Ony daıyndaý barysynda jasandy ıntellektiniń álemdik ekonomıkaǵa, ónerkásipke, memlekettik qyzmetterge jáne qoǵamǵa ákelip otyrǵan jyldam ózgeristeri eskerilgen.
Jańa jol kartasy Túrkııanyń tehnologııalyq básekege qabilettiligin arttyryp, eldiń tsıfrlyq egemendigin nyǵaıtýǵa jáne jasandy ıntellekt salasyndaǵy ulttyq múmkindikterdi damytýǵa serpin berýge tıis.
Qujatta jasandy ıntellekt salasyndaǵy saýattylyqty arttyrý, bilikti mamandar daıarlaý, derekter ınfraqurylymy men esepteý qýattaryn keńeıtý, sondaı-aq tehnologııalardy memlekettik jáne jeke sektorlarda keńinen engizý kózdelgen.
Básekege qabiletti ári senimdi ulttyq jasandy ıntellekt ekojúıesin qalyptastyrýǵa erekshe nazar aýdarylǵan. Jospardyń negizine adamǵa baǵdarlanǵan damý, senim, etıka jáne turaqtylyq qaǵıdattary alynǵan.
Túrkııanyń Ónerkásip jáne tehnologııalar mınıstri Mehmet Fatıh Kadjyr aldaǵy eki jylda bılik 5 mıllıon azamatqa jasandy ıntellekt negizderin úıretýdi josparlap otyrǵanyn málimdedi. Bilim berý baǵdarlamalarynda tehnologııany paıdalanýdyń múmkindikterimen qatar, oǵan baılanysty táýekelder de qamtylady.
Sonymen qatar Túrkııalyq jasandy ıntellekt ázirleýshileri úshin memlekettik organdardyń shamamen 2 myń derekter jınaǵyn qoljetimdi etý josparlanyp otyr. Mınıstrdiń aıtýynsha, bul jasandy ıntellektini bilim berý, densaýlyq saqtaý, energetıka, kólik jáne qarjy sııaqty salalarda qoldanýǵa jańa múmkindikter ashady.
Jańa jospar ulttyq jasandy ıntellekt tehnologııalaryn odan ári damytýǵa jáne olardy 2030 jylǵa deıin Túrkııa ekonomıkasy men memlekettik basqarý júıesine ıntegratsııalaýǵa negiz bolmaq.
Buǵan deıin Túrkııa Prezıdenti Rejep Taıyp Erdoǵan barlyq jastaǵy azamattardyń jasandy ıntellekt tehnologııalaryn jaqsy túsinip, olardy qaýipsiz paıdalanýyna múmkindik beretin ulttyq jasandy ıntellekt saýattylyǵyn arttyrý baǵdarlamasy iske qosylatynyn málimdegen bolatyn.
