Túrkııa 15 jasqa tolmaǵandarǵa áleýmettik jelini shektemek
ASTANA. KAZINFORM — Túrkııada 15 jasqa tolmaǵan balalarǵa áleýmettik jelini paıdalanýǵa tyıym salynady, dep habarlaıdy Kazinform agenttiginiń Ankaradaǵy menshikti tilshisi.
Tıisti ereje búgin Túrkııanyń resmı basylymynda jarııalandy. Qujat boıynsha 15 jasqa tolmaǵan balalarǵa áleýmettik jelilerdi paıdalanýǵa tyıym salynady.
Jas mólsheri e-Devlet elektrondy memlekettik qyzmetter júıesi arqyly berilgen qujat negizinde tekseriledi. Al 15 jasqa tolmaǵan balalardyń akkaýnt ashý týraly ótinishteri qabyldanbaıdy.
15 jastan asqan paıdalanýshylardyń akkaýnttary ádepkide jabyq bolady. Olarǵa tikeleı efır júrgizýge jáne jekelendirilgen jarnama kórsetýge tyıym salynady. Sondaı-aq platformalarda jelide otyrý ýaqytyn uzartýǵa baǵyttalǵan sheksiz lenta qoldanylmaıdy.
Balalarǵa ózderi jazylǵan akkaýnttardan ǵana habarlama jiberýge ruqsat etiledi. Sondaı-aq olardyń jazylýshylary men jazylymdary týraly málimetter ózge qoldanýshylarǵa kórinbeıdi.
Áleýmettik jeliler ata-analarǵa balasynyń akkaýntyn basqarýǵa, jelide ótkizetin ýaqytyn shekteýge jáne aqyly qyzmetterdi paıdalanýyna ruqsat berýge tıis.
Jańa erejeler 2026 jylǵy 1 qarashadan bastap kúshine enedi. Qoldanystaǵy akkaýnttardyń jasyn tekserý 2027 jylǵy 31 naýryzǵa deıin aıaqtalýǵa tıis. Al 15 jasqa tolmaǵan balalardyń akkaýnttary buǵattalady.
Buǵan deıin Túrkııada áleýmettik jelilerge qatysty talap kúsheıip jatqanyn habarlaǵan edik.
