Túrkııa halqy respýblıkanyń 100 jyldyǵyn atap ótip jatyr
29-shy qazandy túrik halqy erekshe yqylaspen kútti. Bul kún túrik halqy úshin erekshe mereke. Búgin mereıtoılyq data erekshe qýanyshty jaǵdaıda ótip jatyr. Sonymen qatar túrik halqy eliniń 100 jyldyq tarıhyn da eske alýda, dep habarlaıdy Kazinform.
Jyl saıyn túrikter 29-qazandy eń basty ulttyq merekesi – Respýblıka kúnin atap ótedi. Osy kúni, ıaǵnı 1923 jyly Túrkııa respýblıka bolyp jarııalandy.
1923 jyldyń 29 qazany kúni Mustafa Kemal Atatúrik Túrkııany respýblıka dep jarııalady. Osydan keıin Túrkııanyń Uly Ulttyq Jıynynda (Túrkııa parlamenti) daýys berilip, Atatúrik Túrkııa Respýblıkasynyń tuńǵysh prezıdenti bolyp jarııalandy.
Respýblıka kúnine arnalǵan alǵashqy saltanatty shara Túrkııa Respýblıka bolyp jarııalanǵannan keıin bir jyldan soń-aq ótti. Atalǵan merekege resmı mártebe 1925 jyly berilip, sol kezden bastap, mereke ulttyq deńgeıde atalyp ótip keledi.
Tarıhtyń jańa paraǵyn ashyp, Túrkııa Respýblıka bolyp jarııalanǵannan beri 100 jyl ótti. «Táýelsizdik esh kúmánsiz halyqqa tıesili» degen uran memlekettik basqarý isinde erekshe oryn aldy.
Búgin Túrkııanyń 100 jyldyǵyna oraı Rejep Taııp Erdoǵan bastaǵan memlekettik qyzmetshiler Anytkabırge baryp, Atatúrik mavzoleıine gúl qoıdy.
Ulttyq mereke el halqyn biriktiredi. Іs-sharada sonymen qatar eldiń basty oppozıtsııalyq kúshteriniń biri «Respýblıkalyq halyq partııasynyń» kóshbasshysy Kemal Kylychdaroglý da qatysty.
Osylarmen qatar Prezıdent kesheninde mereke aıasynda «Respýblıkanyń 100 jyldyǵyna 100 sýret» maıly kenep kórmesiniń ashylýy ótti.
Ataýly dataǵa oraı Prezıdent ákimshiliginiń baılanys jónindegi basqarmasy birqatar kólemdi is-shara daıyndaǵan. Osy is-sharalar aıasynda Túrkııa astanasynda eldiń 100 jyldyǵyn tanytatyn tsıfrlyq kórmeler, jaryq jáne úsh deńgeıli shoý uıymdastyryldy.
