Túrkitildes elderdiń úzdik ártisteri Astanadaǵy kontsertte óner kórsetti
ASTANA. 7 shilde. QazAqparat - Túrkitildes elderdiń úzdik oryndaýshylary Astana qalasyndaǵy qala kúnine oraılastyrylǵan «Astana - jastardyń jyr mekeni!» atty gala-kontsertte óner kórsetti. Ol «Qazaq eli» monýmentiniń janynda ótti.
Keshtiń arnaıy qonaqtary: Qazaqstannyń Halyq ártisi Roza Rymbaeva, keńestik jáne reseılik ánshi, RKFSR-nyń halyq ártisi Rınat Ibragımov, Ózbekstannyń Halyq ártisi Mansur Tashmatov jáne «Eýrovıdenıe-2011» jeńimpazy Eldar Qasymov. Olarmen qosa Álisher Kárimov, Dımash Qudaıbergen, Sevara Nazarhan, Stas Peha sııaqty jas ánshiler án shyrqady.
Ózderiniń repertýaryndaǵy ánderden basqa ártister Astanaǵa arnalǵan ánderdi oryndady. Sondaı-aq astanaǵa mýzykalyq sálemdeme retinde qazaq halyq aspaptarynda óner kórsetildi. Budan basqa, kontsert kezinde uıymdastyrýshylar naǵyz sulýlyq sherýin kórsetti. «Túrki elderiniń sulýlary» atty arnaıy jobanyń aıasynda Qazaqstan, Ázirbaıjan jáne Ózbekstan elderiniń jas talantty dızaınerleriniń jumystary kórsetildi.
Kórsetilim merekelik otshashýmen aıaqtaldy.
