Túrkitildes elderdiń BAQ ókilderi Túrkistanda bas qosty
Túrkistan oblysynyń basty brendin qalyptastyrý men oblystyń oń ımıdjin kóterý maqsatynda uıymdastyrylǵan forýmda Túrkistan qalasyn túrki áleminiń rýhanı ortalyǵyna aınaldyrý kózdelip otyr. Sondaı-aq, óńirdegi ıgilikti isterdi túrki tildes elderdiń BAQ-da taratý jáne ózge memleketterimen aqparattyq salada yntymaqtastyqty arttyrý bolmaq.
Uıymdastyrýshylar basqosýdyń óńir jýrnalıstıkasyn damytý baǵytyndaǵy tyń ıdeıalar men bastamalardy júıeleý úshin ótkizilip otyrǵanyn aıtady. Forýmnyń ashylýynda sóz sóılegen oblys ákimi Janseıit Túımebaev jıynnyń mańyzdylyǵyna toqtalyp, medıa keńistikti damytý men kıeli shahardy Túrki áleminiń rýhanı ortalyǵyna aınaldyrý jolynda osyndaı keleli jıyndardyń oń yqpal etetinin atap ótti.
«Elbasymyz Túrkistan qalasyn Túrki áleminiń rýhanı ortalyǵyna jáne álem týrısteri kelýge asyǵatyn qalaǵa aınaldyrý jóninde tapsyrma bergen bolatyn. Búgin sheteldik aqparat quraldary ókilderin, elimizdiń jetekshi telearnalary men basylymdarynyń basshylaryn, óńirdegi redaktorlar men jýrnalısterdiń basyn qosýdaǵy maqsatymyz da - birlesip jumys isteýge shaqyrý. Oblysty damytý hám túletý baǵytyndaǵy oı-pikirlerin bilý. Qalany kórkeıtýge jáne jýrnalıstıkany damytýǵa arnalǵan usynystardy tyńdaýǵa ázirmiz. Búginde oblys ortalyǵyna memlekettik qyzmetkerlermen qatar birqatar jýrnalıster kóship keldi. Olar Túrkistannyń jańa jylnamasyn jazyp jatyr. Sizderdi de Túrki áleminiń rýhanı ortalyǵyna jumys isteýge shaqyramyn», - dedi Janseıit Túımebaev.
Osy forýmǵa túrki tildes elderden arnaıy shaqyrylǵan aqparat quraldarynyń jetekshileri men ókilderi aldaǵy ýaqytta oblysty halyqaralyq deńgeıde nasıhattaýǵa úles qospaq. Sonymen qatar, shynaıy ári sapaly aqparat arqyly týrızmdi damytyp, ınvestıtsııa tartýǵa kóp kóńil bólip otyrǵanyn tilge tıek etti.
Sonymen qatar, forým barysynda Qazaqstanǵa belgili jýrnalıster men sheteldik BAQ ókilderi osyndaı erkin pikir alańyn qurý aqparat keńistiginiń ashyqtyǵyn odan ári arttyrýǵa múmkindik beretinine nazar aýdardy.
Basqosýda «Qazaq gazetteri» JShS-niń bas dırektory Shámshıdın Patteev, «Egemen Qazaqstan» respýblıkalyq gazeti aktsıonerlik qoǵamynyń basqarma tóraǵasynyń orynbasary Aıbyn Shaǵalaq, «El arna» telearnasynyń dırektory Arman Seıitmamyt, «Ana tili» gazetiniń bas redaktory Janarbek Áshimjan, «Tengrinews.kz portalynyń bas dırektory Suńqar Qarabalın, «Jas qazaq» gazetiniń bas redaktory Smaıyl Sraıyl, «Qazaqparat» HAA bas dırektorynyń keńesshisi Qalamqas Ábýova, Túrkııanyń «TRT» telekompanııasynyń Qazaqstandaǵy ókildiginiń dırektory Abdýlhamıt Avshar, Ázerbaıjannyń ITV teleradıokompanııasynyń Qazaqstandaǵy ókili Majıdı Fýzýlı, Qyrǵyzstannyń «Kabar» ulttyq aqparat agenttiginiń ІT departamentiniń dırektory Kalnýr Janybaev, Tatarstannyń «Tatar-ınform» halyqaralyq agenttiginiń bas dırektorynyń orynbasary Ramıs Latıpov, «ZAŃ» medıa-korporatsııa» JShS bas dırektory Dosymbek Qonysbek sóz sóılep, aqparattyq salany jetildirý baǵytyndaǵy oılaryn ortaǵa saldy. Túrkistan qalasyn kórkeıtý boıynsha da óz usynys-pikirlerin aıtyp, túrkistandyq jýrnalıstermen pikir almasty.
