«Túrkitildes elderdiń aqparattyq keńistigi bir-birine jaqyndaýy tıis» – respýblıkalyq basylymdarǵa sholý

«Egemen Qazaqstan» gazetiniń búgingi sanynda «Qýatty eldiń qadamy da qaryshty» degen taqyryppen maqala jaryq kórdi. Onda Qazaqstanda bir jylda 152 ındýstrııalyq joba iske qosylǵany aıtylady. «Aqıqatynda bıyl bastaý alǵan ındýstrııalandyrý bes­jyl­dyǵynyń alǵashqy jyly elimizdiń órkenıet bıiginen laıyqty oryn ala­tyn áleýetti de damyǵan derjavaǵa laıyq qadam jasaǵandyǵyn pash etti. Mine, osy bir qaryshty qarqynmen damý úrdisine Memleket basshysynyń ózi sáttilik tilep, bir mezette 80 iri ın­dýstrııalyq nysannyń tusaýyn keskendigi de aıqyn dálel bolsa kerek. Ústi­mizdegi jyldyń birinshi jarty­jyl­dyǵynda elimiz boıynsha jalpy quny 380 mıllıard teńgeden asatyn 72 iri óndiris nysany paıdalanýǵa berilip, 12 myń jańa jumys orny ashyldy. Endi mine, ekinshi jartyjyldyqta jalpy quny 450 mıllıard teńgeden asatyn 80 iri ınvestıtsııalyq joba iske qosylyp, taǵy da 12 myń jańa jumys orny ashy­lyp otyr. Bir jyldyń ishinde 152 iri ındýstrııalyq-ınnovatsııalyq jobany iske qosý buryn-sońdy eshqandaı memleket tarıhynda bolyp kórmegen qu­bylys», -delingen maqalada.

Sondaı-aq «Egemen Qazaqstannyń» búgingi sanynda «Altyn sapa» syılyǵy ozǵandarǵa beriledi» atty maqala basyldy. Maqalaǵa keshe Astanada Elbasy Nursultan Nazarbaevtyń «Altyn sapa» jáne «Paryz» konkýrstarynyń jeńimpazdaryn marapattaý rásimine qatysqandyǵy arqaý bolǵan. «Nursultan Nazarbaev «Altyn sapa» jáne «Paryz» konkýrstarynyń jeńimpazdaryn marapattaý rásimine qatysty. «Altyn sapa» syılyǵy ónimder nemese qyzmet kórsetý sapasy sa­lasyndaǵy jaqsy nátıjege qol jetkizgeni, olardyń qaýipsiz­digi­gin qamtamasyz etýde, sondaı-aq mekemelerge zamanaýı menedjment júıesin engizgeni úshin kon­kýrstyq negizde beriledi. Jyl saıyn ótkiziletin «Paryz» kon­kýrsy­nyń maqsaty óz jumys­shy­lary men qoǵam úshin áleýmettik máselelerdi sheshetin jekemenshik kásipkerlik sýbektilerin yn­talandyrý bolyp tabylady», - delingen maqalada.

***

Al «Aıqyn» basylymynyń búgingi sanynda Elbasynyń tikeleı qatysýymen ótken telekópirde kóterilgen máselelerge baılanysty «Jańa joba jańa zaýyt» atty maqala jarııalandy. Onda Mańǵystaý oblysy Túpqaraǵan aýdanynda burǵylaý eritindilerin shyǵaratyn zaýyt ashylǵandyǵy aıtylǵan. «Aýdan irgesinen paıdalanýǵa beriletin bul nysan - elimiz boıynsha burǵylaý ertindilerin shyǵaratyn alǵashqy joba. Zaýyttyń qurylysy 2009 jyly bastalyp, osy jyldyń ІІІ toqsanynda aıaqtalǵan. Zaýyt ázirge 30-dan astam adamdy jumyspen qamtymaq. Bul salanyń tilin bilip, ıgerý úshin de jergilikti mamandar bilim alyp, oqytylmaq», - deıdi maqala avtory.

Sondaı-aq atalmysh basylymnyń habarlaýynsha, keshe Túrkııa Úkimetiniń Aqparat jáne baspasóz basqarmasynyń uıymdastyrýymen «Túrkitildes elderdiń medıa forýmy» bastaldy. Osy basqosýda «Aıqyn» gazetiniń Bas redaktory, Prezıdent syılyǵynyń ıegeri Nurtóre Júsip baıandama jasaǵan. Bul jıyn jaıly tolyq bilgińiz kelse «Túrkitildes elderdiń aqparattyq keńistigi bir-birine jaqyndaýy tıis» atty maqalaǵa zer salyńyz.

***

«Alash aınasy» basylymynyń búgingi sanynda «Aral da «Barsakelmestiń» sońynan ketip qalmaı ma» degen taqyryppen problemalyq maqala jarııalandy. Maqala avtorynyń jazýynsha, Aral teńizi mańyndaǵy memleketterdiń ekonomıkasy alǵa basýy úshin, ekonomıkanyń barlyq salalary turaqty jumys jasap turýy úshin, sý resýrstarymen qamtamasyz etilýi qajet. Al ol úshin Ortalyq Azııa memleketteri arasynda sýdy tıimdi paıdalanýǵa negizdelgen halyqaralyq yntymaqtastyq qajet. «Ózim bilem» dep ózbek ózeýrese, buǵan Qyrǵyzstan qyrsyǵyp alsa, nátıje ońdy bolady dep oılamaımyz», deıdi avtor. Maqalada atap ótilgenindeı, búginde Aralǵa quıatyn ózenderdiń aǵyny jyl ótken saıyn azaıyp barady. Buǵan sý basseıinderiniń mańyndaǵy halyqtyń ósýi, sondaı-aq aýyz sý jáne sýarmaly sý tutynýshylarynyń artýy sebep bolyp otyr. Sonyń saldarynan teńiz mańyndaǵy sharýashylyq zardap shegýde. Jyl ótken saıyn egistik alqaptardyń kólemi tarylyp keledi, nátıjesinde ónimnen túsetin paıda azaıyp, ekonomıkalyq ósim quldyrýda.

Sondaı-aq «Alash aınasynyń» búgingi sanynda «Kelesi jyly zeınetaqy mólsheri 30 paıyzǵa artady», degen taqyryppen maqala basyldy. Maqala avtorynyń aıtýynsha, Memleket basshysy N.Nazarbaev taıaýda elimizdegi zeınetaqy kóleminiń artýyna yqpal etetin ózgerister men túzetýler engizilgen «QR zeınetaqymen qamtamasyz etý týraly» Zańǵa qol qoıdy. Ol boıynsha endi elimizdegi eń tómengi zeınetaqy mólsheri - 24 047 teńgeni, ortashasy 35 950 teńgeni, al eń joǵarǵysy 52 226 teńgeni qamtıtyn bolady. Bul - bútin bazalyq zeınetaqy tólemi nemese eń tómengi kúnkóris kóleminiń 50 paıyz deńgeıi boıynsha jasalyp otyrǵan esep.