Túrkistannyń týrızmin damytý qolǵa alyndy
ASTANA. QazAqparat - Túrkistandaǵy Qoja Ahmet ıAssaýı kesenesine zııarat etýshilerdiń qatary jyldan jylǵa artyp otyr. Ekinshi Mekke dep eseptelinetin tarıhı eskertkishtiń aýmaǵyn abattandyrý, saıahatshylarǵa qoljetimdi qyzmet kórsetý ortalyqtaryn ashý josparlanýda, dep habarlaıdy oblystyq ákimdiktiń baspasóz qyzmeti.
Osy tusta Batys Evropa-Batys Qytaı halyqaralyq dáliziniń boıynda jáne Túrkistandaǵy týrızmdi damytý maqsatyndaǵy jobalardy aıaqtaý úshin 103 mıllıon teńge josparlanýda. Sonymen qatar, óńirde týrızmdi damytý maqsatynda týrıstik aqparattyq ortalyǵy mekemesiniń shyǵyndaryna, is-sharalardy ótkizýge jáne úlestirme materıaldardy ázirleýge 178,2 mıllıon teńge qarastyrylýda.
Aıta ketý kerek, Túrkistanda sońǵy 5-6 jyl kóleminde týrısterge sapaly qyzmet kórsetý maqsatynda onǵa tarta nysan boı kótergen. 2013 jyly kesenege 700 myńnan astam týrıst kelse, 2014 jyly 1 mln-ǵa jýyq adam kelgen. Al 2015 jyldyń 6 aıynda 594,8 myń týrıst osynda at basyn burǵan. Bul kelýshilerge yńǵaıly jaǵdaı men kórsetilgen qyzmettiń nátıjesi. Qalaǵa kelgen týrısterdi ornalastyrýǵa 820 oryndy 20 qonaq úıi jumys isteıdi.
Sonymen qatar tórt juldyzdy qonaq úı qurylysy júrgizilip jatyr. Qolóner sheberleri ortalyǵynyń ǵımaratynda Týrıstik aqparattyq ortalyǵy qurylyp jumysyn bastap jatyr. 2016 jyldyń segiz aıynda qalaǵa 751,1 myń týrıst pen zııaratshylar, onyń ishinde 12,2 myń adam alys, jaqyn shetelderden kelgen ( 2015 j. 8 aıda 740,7 myń adam, onyń ishinde shetelden- 11,5 myń adam).
