Túrkistannyń Sozaq aýdanynda bir kúnde 4 avtobýs jolda qaldy
SOZAQ. QazAqparat – Túrkistan oblysynyń Sozaq aýdanynda qar qursaýynda qalǵan 4 jolaýshylar avtobýsy men 4 jeńil kólik qutqaryldy, dep habarlaıdy QazAqparat.
Túrkistan oblysy aýmaǵynda birneshe kún boıy soqqan boran men qalyń qar kólikterdiń júrýine kedergi keltirip, jolda qaldyrdy.
Aýyr júk kólikteri men jeńil mashınalar jol jıegine shyǵyp ketip, tipti keıbiri bir-birine soqtyǵysqan. Aýa raıynyń qolaısyzdyǵyn eskergen óńirdiń tártip saqshylary respýblıkalyq jáne oblystyq mańyzy bar joldarǵa jumyldyryldy. Táýlik boıyna kúsheıtilgen rejımde jumys istegen polıtseıler barynsha turǵyndarǵa saq bolýlary men úıden shyqpaýlaryn eskertti. Al, jolda qalǵan jolaýshylardy qyzmettik kólikterimen jyly oryndarǵa jetkizdi. Sondaı-aq qarǵa batyp, júre almaı qalǵan kólikterge qaryn kúrep, qaıtadan júrip ketýine yqpal jasady.
Máselen, Sozaq aýdandyq polıtsııa bóliminiń polıtsııa qyzmetkerleri «Ulanbel-Sozaq-Ekpindi» tasjolynda qar qursaýynda qalyp qoıǵandarǵa qol ushyn sozdy. Bir táýlik ishinde 4 avtobýs, 4 jeńil avtokólik jol shetine shyǵyp qalǵan. Tártip saqshylary 100-den astam jolaýshyny qutqaryp, úı-jaılaryna jetkizdi.
Eske salaıyq, buǵan deıin Sozaq aýdanynda qar qursaýynda qalǵan 50 jolaýshyǵa kómek kórsetilgen edi.
