Túrkistannyń ortalyq aýrýhanasy zamanaýı tehnıkamen jabdyqtaldy
TÚRKІSTAN. QazAqparat - Túrkistannyń ortalyq aýrýhanasy jóndeý jumystarynan keıin tolyq jańartylyp, zamanaýı tehnıkamen jabdyqtaldy. Búgin emdeý mekemesinde «Insýlt ortalyǵy» jáne «Trıaj júıesimen» jabdyqtalǵan jańa qabyldaý bólimi ashyldy, dep habarlaıdy QazAqparat tilshisi.
Aýrýhana jumysymen Túrkistan oblysy ákiminiń orynbasary Joldymurat Amanbaev pen óńirdiń densaýlyq saqtaý basqarmasynyń basshysy Muqan Egizbaev arnaıy kelip tanysty. 
Ornatylǵan elektrondyq qural arqyly aýrýhanaǵa kelgen naýqastar ózderiniń jatý kezegin, laboratorııaǵa, rentgen kabınetke, ýltradybystyq zertteýge (ÝZI) tekserilýge qashan kire alatynyn bile alady. Aqparattyq dúńgirshek arqyly naýqastardyń týystary josparly túrde jáne jedel túrde ózderi nemese jedel járdem brıgadasymen kelgen naýqastardyń qaı bólimshede qashan jatqanyn bilýge múmkindik bar. Trıaj júıesi boıynsha medıtsınalyq irikteý úzdiksiz jáne sabaqtastyqpen júrgiziledi. Bir naýqastyń jaǵdaıyn baǵalaý protsesi 60 sekýndtan aspaıdy. Baǵalaý aıaqtalǵannan keıin patsıentter arnaıy túrli-tústi lenta túrindegi irikteý sanatynyń bir túsimen belgilenedi. Jedel járdem brıgadasy alyp kele jatqan naýqas týraly tolyq aqparat aýrýhananyń qabyldaý bóliminde kórinip turady. Aýrýhananyń qabyldaý bólimindegi «SOS» batyrmasyn basý arqyly dárigerlerdi jáne zerthana mamanyn shuǵyl kómekke shaqyrýǵa bolady. 
Medıtsına salasynyń qyzmetkerleri Keshendi medıtsınalyq aqparattyq júıemen jumys istep, naýqastardyń barlyq qujattary elektrondyq túrde júrgizilýde.
