Túrkistannyń óńirlik tabıǵı parkindegi buqar buǵylarynyń sany 146 basqa jetti
ShYMKENT. QazAqparat - Túrkistandaǵy Syrdarııa-Túrkistan memlekettik óńirlik tabıǵı parkindegi buqar buǵylarynyń sany 146 basqa jetti, dep habarlaıdy QazAqparat tilshisi.
Aıta keteıik, 2000 jyly «Syrdarııa-Túrkistan» memlekettik óńirlik tabıǵı parkiniń Túrkistan fılıalynda Syrdarııa ózeniniń boıyndaǵy toǵaı ormanynan 2 gektar jer ýchaskesine qorshaý ornatylyp, buqar buǵylarynyń tuqymbaǵy uıymdastyrylǵan bolatyn. Sol kezde Túrkistan qalasynyń 1500 jyldyq mereıtoıyna kelgen Memleket basshysy osy óńirdiń toǵaı, ormanyn mekendegen janýarlardy kóbeıtip, keleshek urpaqqa saqtap qalý maqsatynda 8 bas buqar buǵysyn syıǵa tartqan edi. Osylaısha, jersindirilgen buǵylardyń sany 17 jylda 138 basqa artyp, 146-ǵa jetti. Oblystyq tabıǵı resýrstar jáne tabıǵat paıdalanýdy retteý basqarmasy mamandarynyń habarlaýynsha, janýarlardyń jyldyq ósimi 6-8 bas aralyǵynda bolsa, sońǵy úsh jylda analyq buǵylar jylyna 11-16 bas aralyǵynda tóldegen.
Aıta óteıik, buqar buǵylarynyń ómir súrý uzaqtyǵy 15-20 jyl. Janýar túri qazirgi tańda Qazaqstannyń jáne halyqaralyq tabıǵatty qorǵaý odaǵynyń Qyzyl kitaptaryna enip, qorǵaýǵa alynǵan. Onyń bıologııalyq erekshelikteri - analyqtarynda múıiz bolmaıdy. Atalyqtarynda bes butaqty múıiz bolady. Múıizi jylma jyl túsip, aýysyp otyrady. Mamyr-maýsym aılarynda tóldeıdi.
