Túrkistannyń Maqtaaral aýdanynda asfalt-beton zaýyty iske qosyldy
TÚRKІSTAN. QazAqparat - Túrkistan oblysynyń Maqtaaral aýdanynda ındýstrıaldyq aımaq pen logıstıkalyq ortalyq jumys isteıdi. Qazirgi tańda Germanııadan ákelingen tehnologııamen «Soldatos» JShS-nyń asfalt-beton zaýyty óz jumysyn bastady. Bul týraly Túrkistan oblysynyń óńirlik kommýnıkatsııalar qyzmetinde ótken brıfıngte Maqtaaral aýdanynyń ákimi Baqyt Asanov málim etti, dep habarlaıdy QazAqparat.
Óndiris orny táýligine 1 myń tonna asfalt-beton ónimderin óndire alady. Quny 300 mıllıon teńgeni quraıtyn zaýyt 30 adamdy jumyspen qamtyp otyr.
«Buǵan deıin ishki kóshelerdi jóndeýge qajetti asfalt ónimderin Saryaǵash aýdanynan aldyryp keldik. Bul joldyń uzaqtyǵy úshin asfalt baǵasyn qymbattatsa, ekinshi jaǵynan sapasyn nasharlatatyn. Óıtkeni, asfalt balqyǵan kúıinde tóselýi tıis. Mine, jańa óndiris oshaǵyn ashý arqyly Maqtaaral jáne Jetisaı aýdanyn asfalt-beton ónimderimen qamtamasyz etip otyrmyz» - dedi Baqyt Nasyrhanuly.
Aımaq basshysynyń aıtýynsha, Maqtaaral aýdanynda ónerkásip óniminiń kólemi ótken jyly 5,8 mlrd teńgeni qurasa, bıyl bul kórsetkish 6,5 mlrd teńgege jetti. Al byltyr óńdeý ónerkásibiniń ónim kólemi 4,5 mlrd teńge bolsa, bıyl 5 mlrd teńgeni qurady.
Qazirgi tańda aýdanda «Asi Metall Grup LTD» JShS-nyń temirdi qaıta óńdeý óndirisi zaýytynyń qurylysy júrip jatyr. Óndiris orny jylyna 3 myń tonna temirdi qaıta óńdeı alady. 100 mıllıon teńgeniń qunyn quraıtyn zaýyt 30 adamdy turaqty jumyspen qamtyp otyr.
Sonymen qatar, Maqtaaral aýdanynda 2018-2019 jyldarda Óńirler kásipkerligin qoldaý kartasynan tys iske asatyn 3 joba bar. Olar «GREEN CROOS ECO» JShS-nyń medıtsınalyq-farmatsevtıkalyq zattar óndirisi. 2019-2021 jyl aralyǵynda iske asyrylatyn joba jylyna 10 myń dana ónim shyǵara alady. Quny 300 mıllıon teńgeni quraıtyn óndiris orny iske qosylǵannan soń 35 adamdy turaqty jumyspen qamtıtyn bolady.
«Megagorstroı» JShS-nyń kókónis saqtaý qoımasy jáne «Baqtııarov» JK-niń avtoparkıng qyzmeti. Quny 352,8 mıllıon teńgeni quraıtyn qoıma 1000 tonna ónimdi syıdyra alady. Sondaı-aq, joba iske qosylǵanda 28 adam jumyspen qamtylmaq.
Maqtaaral aýdanynyń logıstıkalyq ortalyǵynda júzege asyp jatqan taǵy bir joba - «Baqtııarov» JK-nyń avto turaqjaıy, qonaq úı jáne qyzmet kórsetý ortalyǵy. Jobaǵa 250 mıllıon teńge qarjy qarastyrylǵan. Sondaı-aq, 25 adamdy jumyspen qamtý kózdelip otyr.
