Túrkistannyń eks-prokýrory 100 myń dollar men jer telimderin para retinde alǵan dep aıyptalýda
ShYMKENT. QazAqparat - Túrkistannyń eks-prokýrory 100 myń dollar men 5 jer telimin para retinde alǵan dep aıyptalýda. Bul týraly Ońtústik Qazaqstan oblystyq Qylmystyq ister jónindegi mamandandyrylǵan aýdanaralyq sotynda ótken alǵashqy sot otyrysynda málim boldy, dep habarlaıdy QazAqparat tilshisi.
Atalǵan sottyń resmı ókili Ábınur Qarabaevtyń sózinshe, Túrkistannyń burynǵy prokýrory Mahat Zulpyharov Qylmystyq kodekstiń 366 baby 4 bóligimen («Para alý»), al onyń kómekshisi Qylmystyq kodekstiń 28 baptyń 5 bóligi «Qylmystyq quqyq buzýshylyqqa sybaılas qatysýshylardyń túrleri» jáne 366-baptyń 2-bóligi «Para alý» boıynsha aıyptalýda. Alǵashqy sot otyrysynda prokýror aıyptaý aktisin oqydy.
«Zulpyharov 100 myń dollardy para retinde alǵan dep aıyptalýda. Qomaqty aqshany Túrkistan qalalyq jer-kadastr fılıaly dırektorynan qylmystyq jaýapkershilikke tartpaý úshin suraǵan. Prokýrorlar bul mekemede tekserý sharalaryn júrgizý barysynda osy dırektordyń zańsyz jer telimin bergenin anyqtaǵan. Mekeme basshysyna «eger 100 myń dollar berseń, ústińnen qylmystyq is qozǵamaımyz. Bul isti azamattyq tártippen sotta qarap, berilgen jer telimderin memleket paıdasyna qaıtaramyz» dep ýáde bergen»,- dedi Ábınur Qarabaev.
Oblystyq Qylmystyq ister jónindegi mamandandyrylǵan aýdanaralyq sotynyń resmı ókili sondaı-aq burynǵy qadaǵalaý organy ókiliniń para retinde jer telimin suraǵanyn da aıtady.
«Prokýror qalalyq jer-kadastr fılıaly dırektory Kópbaevtan ózine jáne týystaryna 10 jer telimin surap, ony zańdy túrde rásimdep berýin talap etken. Bul úshin ol óziniń kómekshisi Júnisbekovty tartyp, sońǵysy tanystary men týystarynan bes adamdy tapqan. Sóıtip sol bes adamnyń atyna jer telimderi rásimdelgen»,- dedi Ábınur Qarabaev.
Dese de sot otyrysynda Túrkistannyń burynǵy prokýrory qylmysyn túbegeıli moıyndaǵan joq. Endi eki aıyptalýshynyń da qylmys jasaǵan, jasamaǵandary sot barysynda anyqtalatyn bolady. Birneshe kýágerler suralyp, qujattar tekserilmek.
Aıta keteıik, Túrkistan qalasynyń burynǵy prokýrory iri mólsherde para aldy dep ustalyp, ýaqytsha tergeý abaqtysyna qamaldy. Al onyń kómekshisi qylmys jasaýǵa kómektesken degen kúdikpen bultartpaý sharasy retinde kepil qoldanylǵan. Qazir Mahat Zulpyharov pen onyń kómekshisine qatysty qylmystyq is Ońtústik Qazaqstan oblystyq qylmystyq ister jónindegi mamandandyrylǵan aýdanaralyq sotynda qaralýda.
