Túrkistannyń bes aýdanynda áleýmettik ınfraqurylym damıtyn boldy
TÚRKІSTAN. QazAqparat - Túrkistan oblysynyń ońtústik aımaǵynda oryn tepken Saryaǵash, Keles, Jetisaı, Maqtaaral, Shardara aýdandaryn sý, gazben jabdyqtaý jáne bilim nysandaryn salý úshin kelesi jyly 10 joba iske asyrylady. Ol úshin respýblıkalyq bıýdjetten 16 mlrd. teńge bólinedi. Bul týraly osy aımaqtaǵy jumystardy qadaǵalaýǵa kelgen oblys ákimi Ómirzaq Shókeev málimdedi, dep habarlaıdy oblystyq ákimdiktiń baspasóz qyzmeti.
«Túrkistan oblysynyń ońtústik aımaqtarynyń damýyna oń serpin beretin 67 jobany qolǵa aldyq. Onyń 10 jobasyn Úkimet maquldap, tıisti qarajat bóletin boldy. Budan bólek, oblystyq bıýdjet esebinen 40 mlrd teńge qaralyp, 57 joba iske asyrylyp jatyr. Ol qarjynyń 30 mlrd. teńgesi bıyl bólinse, 10 mlrd. teńgesi kelesi jyly osy jobalardy aıaqtaýǵa bólinetin bolady», - dedi óńir basshysy.
Atalǵan jobalar - áleýmettik ınfraqurylymdy quraıtyn, aýyldyq jerde mektep, aýrýhana salý, jol tartý, gaz qubyryn qosý jumystaryn júrgizýge arnalǵan. Ońtústik aımaqta ornalasqan Shardara, Keles, Jetisaı, Maqtaaral, Saryaǵash aýdandarynda turatyn halyqty 2020-2021 j. tolyǵymen gaz, sýmen, elektr energııasymen qamtamasyz etý boıynsha oblys ákimdiginiń tarapynan Úkimetke usynys berilip, 16 mlrd. teńge qarajat bólinetin boldy.
Byltyr oblys damýynyń Keshendi jospary jasalǵanda negizgi basymdyq halyq sany 1 mıllıonǵa jýyqtaıtyn ońtústik aımaqtyń áleýmettik ınfraqurylymyn damytýǵa berilip, jol, turǵyn úı-kommýnaldyq sharýashylyq salasyndaǵy jáne áleýmettik nysandar kóptep salynýda.
