Túrkistannyń bas josparyn ázirleýge sheteldik sáýletshiler tartylady
TÚRKІSTAN. QazAqparat - Oblys ortalyǵyna aınalǵan Túrkistan shaharynyń bas josparyn ázirleýge sheteldik sáýletshiler de atsalysady. Bul týraly qala ákimi Álipbek Óserbaev málimdedi, dep habarlaıdy QazAqparat tilshisi.
Shahar basshysynyń sózinshe, qalada kelesi aıda halyqaralyq sáýletshiler baıqaýy ótedi dep kútilýde. Sol baıqaýda iriktep alynatyn úzdik jobalar Bas josparǵa engiziletin bolady. Bastysy, jańadan salynatyn nysandardyń basym kópshiligi shyǵys úlgisinde bolýy tıis. Sondaı-aq zamanaýı ári tarıhı mánge ıe bolýy talap etiledi. Budan bólek, ǵımarattardyń sapasyna, syrtqy keskin-kelbetine de basa nazar aýdarylady. Óıtkeni, nysandar tarıhı shaharǵa laıyq bolýy kerek.
Oblystyq Qurylys basqarmasy basshysynyń orynbasary Erbol Ahmetovtyń aıtýynsha, dál osy konkýrstan keıin Túrkistan oblysynyń ákimshilik-iskerlik ortalyǵynda qurylys jumystary bastalady. Aldyn ala boljam boıynsha, Túrkistannyń kúnshyǵys bóligindegi ortalyqta 300 gektarǵa ýyq aýmaq qurylys alańyna aınalady.
«Jalpy, Túrkistan seısmıkalyq jaǵynan qaýipti aımaqqa jatpaıdy. Bul jerdiń jerasty sýy da tómen, ári jeri qatty. Bul óz kezeginde qurylys qunynyń arzan bolýyna yqpal etedi. Sebebi, sýy joǵary ózge sazdy aımaqtarǵa qaraǵanda shyǵyn az jumsalady», - deıdi Erbol Ahmetov.
