Túrkistannyń aýyl sharýashylyǵyna Polsha tehnologııasy engiziledi
TÚRKІSTAN. QazAqparat -Túrkistan qalasynda «Túrkistan: polshalyq bıznes úshin jańa múmkindikter» atty halyqaralyq Qazaqstan-Polsha bıznes-forýmy ótti. Bul týraly QazAqparat ákimdiktiń baspasóz qyzmetine silteme jasap habarlaıdy.
Sheteldik delegattar quramynda ekonomıka, aýyl sharýashylyǵy, telekommýnıkatsııa jáne mashına jasaý salalarynda qyzmet etetin 20-ǵa jýyq kásipkerler men kompanııa ókilderi boldy. Delegatsııany Polshanyń Qazaqstandaǵy Tótenshe jáne Ókiletti Elshisi Selım Hazbıevıch bastap keldi. Qonaqtar Túrkistan oblysynyń kásip ıelerimen kezdesti.
«Túrkistan» ÁKK» AQ-nyń fılıaly «Turkistan Invest» kompanııasy uıymdastyrǵan forým aıasynda qos tarap birigip júzege asyratyn jobalar, eksport pen ımportqa qatysty máseleler jaıynda sóz qozǵady. «Investıtsııa jáne saýda boıynsha polshalyq agenttik» AQ sheteldik saýda ofısiniń basshysy ıÝlııa Gorodetskaıa bul bıznes-forým eki eldiń naryqtaǵy jaǵdaıyn jaqsartýǵa áser etetinin aıtty.
«Forým Polsha men Túrkistan oblysy arasyndaǵy saýda-ekonomıkalyq damýdyń jańa joldaryn aıqyndaýǵa úlken úlesin qosady. Ortalyq Azııaǵa jol ashatyn Qazaqstan Eýropa men Azııa úshin mańyzdy rólge ıe. Eýropalyq Odaq naryǵyna jeteleıtin Polsha da sizder úshin týra sondaı mańyzdy el bolyp tabylady. Qazaqstan men Polsha - ınvestıtsııalyq baılanys boıynsha da jaqsy áriptes elder», - dedi ıÝlııa Gorodetskaıa.
Kezdesý barysynda Túrkistan oblysy aýmaǵynda aýyl sharýashylyǵy salasyndaǵy polshalyq tehnologııalardy endirý týraly usynys aıtyldy. Onyń ishinde, sheteldik kásipkerler sý, sút jáne suıyq maıdy quıý boıynsha bıznesterdiń daıyn nusqalaryn tanystyrdy. Polshalyq bıznes ókilderi qajetti qural-jabdyqtarmen qamtamasyz etýmen qatar, jumysshylardy oqytyp, úıretetindikterin de jetkizdi.
«Biz agrarlyq ólkemiz, sondyqtan bizge búgingi tańda agroónerkásiptik keshen boıynsha kóshbasshy bolyp tabylatyn polshalyq tehnologııalar qajet. Óńirimizde qaıta óńdeýge bolatyn aýyl sharýashylyǵy ónimderiniń kólemi úlken. Olardy tek Qytaı men Reseıge ǵana emes, sondaı-aq, Polshaǵa da tasymaldaı alamyz», - dedi Narıman Ilıasov.
Іs-shara barysynda eki taraptyń kásip ıelerine arnalǵan V2V formatyndaǵy kezdesýler uıymdastyryldy. Nátıjesi retinde yntymaqtastyqty ary qaraı damytyp, ony nyǵaıtýǵa baǵyttalǵan birqatar qujattarǵa qol qoıyldy. Forýmǵa qatysýshylar bul basqosýdyń qos elge de tıimdi bolatyndyǵyna senim bildirdi.
Aıta keterlik jaıt, Qazaqstan men Polsha arasyndaǵy taýar aınalymy 1 mlrd. AQSh dollarynan astam somany quraıdy. Qazaqstanǵa Polsha farmatsevtıkalyq, kosmetıkalyq ónimder men qantty tasymaldaıdy. Al Qazaqstan mıneraldyq ónimderdi, kómir men bıdaıdy eksporttaıdy. Búgingi tańda elimizde 200-den astam polshalyq kompanııalar qyzmet etedi.
