Túrkistannan mln tonna ónim elimizdiń soltústik óńirlerine jóneltildi
TÚRKІSTAN. QazAqparat - Túrkistan oblysynda 2018 jyly kókónis, kartop, baqsha daqyldarynan 2,9 mln tonna ónim jınalyp, rekordtyq kórsetkishke qol jetkizildi. Onyń respýblıkalyq úlesi 43% qamtyǵan. Bul týraly óńirlik kommýnıkatsııalar qyzmetinde aıtyldy, dep habarlaıdy QazAqparat.
Túrkistan oblystyq aýyl sharýashylyǵy basqarmasynyń basshysy Nurbek Badyraqov egistikti ártaraptandyrýdyń arqasynda jınalǵan ónimniń 500 myń tonnaǵa jýyǵy Reseı, Belarýs, Latvııa, Germanııa memleketterine eksporttalsa, 1 mln tonnasy elimizdiń soltústik óńirlerine jóneltilgenin jetkizdi.
«Masaqty dándi daqyldar egis kólemi aldyńǵy jyldan 22,8 myń gektarǵa artyp, 227,4 myń gekttarǵa, dándik júgeri 6,6 myń gektarǵa artyp, 43,9 myń gektarǵa, kókónis, kartop, baqsha daqyldary 7,5 myń gektarǵa artyp, 114 myń gektarǵa, maıly daqyldar 93,3 myń gektarǵa, maqta daqyly 132,5 myń gektarǵa, mal azyqtyq daqyldar 189,3 myń gektarǵa egildi. 2018 jyly aýa raıynyń qýańshylyq bolǵanyna qaramastan, dıhandardyń eseli eńbeginiń arqasynda masaqty dándi daqyldardyń ár gektarynan 17,8 tsentnerden 405 myń tn ónim jınaldy. Júgeriden ár gektardan 48,5 tsentnerden 213 myń tonna ónim jınalyp, ótken jylmen salystyrǵanda 47 myń tonnaǵa artty. Respýblıkalyq úlesi - 24%-ǵa jetti», - dedi basqarma basshysy.
Munan bólek, maqta daqylynyń gektar túsimdiliginde de oń nátıje bar. Onda 25,7 tsentnerden, barlyǵy 340,7 myń tn maqta jınalǵan. Bul 2017 jylmen salystyrǵanda 10,2 myń tonnaǵa kóp. Óńirdegi qarqyndy baýlardyń kólemi 2800 gektarǵa jetkizilip, jemis-jıdekten 118 myń tonna ónim alynypty. Respýblıkada óndirilgen jemistiń 40%-yn Túrkistan oblysy berse, júzimnen 73 myń tonna ónim jınalyp, Respýblıkadaǵy úlesi 73% qamtyǵan. Jalpy, ótken 2018 jyly aýyl sharýashylyǵy daqyldarynyń egis kólemi 2017 jyldan 15,1 myń gektarǵa artyp, 813,5 myń gektarǵa jetken.
Bul rette, oblysta osyndaı jetistikterge jetýde jańa tehnologııalardy ıgerýdiń paıdasy týraly aıtpaı ketýge bolmas. Máselen, aýyl sharýashylyǵynda jańa tehnologııalardy transfertteý aıasynda 2018 jyly oblysymyzda jańadan 7174 gektarǵa tamshylatyp sýǵarý júıesi endirilip, onyń jalpy kólemi 65 017 gektarǵa (2017 jyly 57,8 myń ga) jetipti. Ol onyń respýblıkadaǵy úlesi 73%-dy qurady. Bul jumystar odan ári de jalǵasa bermek. 2019 jyly «Túrkistan oblysynyń agroónerkásip keshenin damytýdyń óńirlik baǵdarlamasyna» sáıkes, 7 440 gektar alqapqa tamshylatyp sýǵarý júıesin endirý josparlanýda.
