Túrkistannan Belarýske oramjapyraqtar eksporttala bastady
TÚRKІSTAN. QazAqparat – Túrkistan oblysynyń sharýalaryna ónimderin eksportqa shyǵarýǵa qatysty kedergiler men tosqaýyldar alynyp tastaldy. Óńirdiń dıqandary 500 tonna oramjapyraqty Belarýske satý boıynsha kelisim jasap, alǵashqy 200 tonna ónim tıelgen júk kólikteri jolǵa shyǵyp ketti, habarlaıdy QazAqparat tilshisi.
Túrkistandyq sharýalardyń biri Hýseın Babýrov kúnine 40-60 tonna ónimin eksportqa jiberýde. Refrıjeratory bar júk kólikterine tıelgen kapýsta araǵa 5 kún salyp Belarýs eline jetedi dep josparlanǵan. Ol jaqtaǵy qoımaǵa túsken qazaqstandyq eksportty saýdagerler ózge qalalarǵa jóneltedi.
Al, Amantaı Sarybaev atty sharýa kókónis tıeıtin traktor men jumysshylarǵa tólenetin jalaqyny eseptegende ár gektarǵa ketetin shyǵyn 1 mln teńgeni quraıtynyn aıtady. Aýyl ishindegi oramjapyraqtardy tazalap, júk kóligine qalaıtyn jumysshylardyń kúndik jalaqysy 3000-7000 teńge aralyǵynda. Shetelge shyǵatyn júk kólikteriniń shyǵyny 1 600 AQSh dollaryna jetken. Sondyqtan dıqandar ótken jylǵa qaraǵanda túsetin kiris te azyraq dep otyr. Degenmen, osynyń ózine shúkirshilik etýde.
Búginde aýylsharýashylyǵy ónimderi tıelgen júk kólikteri shekaradan esh kedergisiz ótýde. Blokbeketterde olardyń tek dene qyzýyn tekseredi. Aıta keteıik, buǵan deıin túrkistandyq sharýalar oramjapyraqty eksportqa shyǵarýǵa baılanysty túrli kedergilerge tap bolyp jatqanyn aıtqan bolatyn. Daıyn ónimderi egin alqabynda shirip jatqan olar osy máselege oraı jergilikti bılikten kómek suraǵan. Bul máseleni oblys ákimi Ómirzaq Shókeev te Úkimettiń kezekti otyrysynda kótergeni belgili.
