Túrkistannan Almaty oblysyna jolǵa shyǵyp, habarsyz ketken jasóspirim tabyldy
TALDYQORǴAN.QazAqparat - 25 maýsym kúni Túrkistan oblysynan Almaty oblysyna qaraı avtobýspen jolǵa shyǵyp, habarsyz ketken Amırjan Kýchakov tabyldy. 16 jastaǵy jasóspirim búgin tústen keıin ata-anasymen qaýyshty, dep habarlaıdy QazAqparat tilshisi.
«Amırjan Kýchakov Almaty oblysyndaǵy Qarasaı aýdanynyń Qaskeleń qalasyna kelip, joǵalǵan. Onyń ata-anasy balanyń joǵalǵandyǵy jóninde aýdandyq ІІB-ge habarlap, birden tártip saqshylary izdeýge kiristi. Amırjannyń telefony tekserilip, onyń sońǵy ret qaı jerde, kimmen sóıleskeni anyqtaldy. Nátıjesinde, Amırjan bazarlardyń birinde óziniń jerlesin taýyp, sonymen birge Túrkistan oblysyndaǵy Ordabasy aýdanynyń Amangeldi aýylyna qaraı jolǵa shyqqany belgili boldy. Bala sol aýyldan tabyldy. Almaty oblysynyń tártip saqshylary Amırjannyń tabylǵandyǵy jóninde ata-anasyna habar berip, jasóspirimdi jaqyndary alyp ketti», dep málim etti Almaty oblystyq ІІD baspasóz qyzmetiniń ókili Kóbeıhan Nurahmet.
Esterińizge sala keteıik, biz buǵan deıin 16 jastaǵy jasóspirimniń joǵalǵandyǵy jóninde habarlaǵan bolatynbyz.
