Túrkistanǵa jylyna 10 mıllıon týrıst tartý kózdelip otyr
«Áziret Sultan jobasy sheteldik qonaqtar men qazaqstandyqtar úshin zııarat etetin orynǵa aınalady. Qazirgi tańda Túrkistanǵa jylyna 1,5 mıllıon adam keledi. Al 2025 jylǵa qaraı biz týrısterdiń sanyn 10 mıllıon adamǵa deıin kóbeıtemiz», - dep málimdedi mınıstr.
Arystanbek Muhamedıuly osy jyldyń 29 qyrkúıeginde Memleket basshysynyń Túrkistan óńirine sapary barysynda mınıstrlik elimizdiń ejelgi nysandarynyń biri - Túrki áleminiń rýhanı ortalyǵy «Áziret Sultan» murajaı-qoryǵynyń tartymdylyǵyn damytýdyń uzaq merzimdi josparyn usynǵanyn eske saldy. Oǵan sáıkes, Túrkistan qalasynyń orta ǵasyrdaǵy qalpyn 88 gektar aýmaqta qalpyna keltirý kózdelýde. Ol - ıÝNESKO-nyń eń iri álemdik muralarynyń biri bolmaq.
«Bul joba ejelgi Pompeı qalasyndaǵy ashyq aspan astyndaǵy murajaıdyń, Ierýsalım, Osman ımperııasynyń Topkapy saraıyn qalpyna keltirýdiń tájirıbesin esepke ala otyryp jasaldy. Halyqaralyq standarttarǵa saı bolý úshin jobany damytýǵa jetekshi halyqaralyq ǵalymdar men sarapshylar tartyldy, túpnusqa kózder zerttelip, ǵylymı muraǵattyq derekter jáne arheologııalyq jumystar ıÝNESKO ókilderimen kelisildi», - dedi Arystanbek Muhamedıuly.
Eske sala ketsek, 19 maýsymda Memleket basshysy Nursultan Nazarbaev Túrkistan oblysyn qurý týraly Jarlyqqa qol qoıǵan bolatyn.
«Búgin «Qazaqstan Respýblıkasynyń Ákimshilik-aýmaqtyq qurylysy týraly» Zańynyń toǵyzynshy babyna sáıkes, Shymkent qalasyna respýblıkalyq mańyzy bar qala mártebesin berý jáne oblys ortalyǵyn Túrkistan qalasyna kóshirý týraly Jarlyqqa qol qoıǵaly otyrmyn. Budan bylaı bul óńir Túrkistan oblysy dep atalatyn bolady. Osy ákimshilik aýmaqtyń qurylymyna ózgeris engizý arqyly bul óńirdiń órkendeýine tyń serpin berýdi kózdegen tarıhı qujat bolyp sanalady», - degen edi Memleket basshysy.
