Túrkistanǵa sý jańa tazalyq tehnıkalary berildi
TÚRKІSTAN. QazAqparat - Túrkistan oblysynyń ortalyǵy Túrkistan qalasyna sý jańa tazalyq tehnıkalary berildi. Atalǵan kólikterdiń kiltin saltanatty túrde qala ákimi Álipbek Óserbaev tabystady, dep habarlaıdy QazAqparat tilshisi.
Zamanaýı úlgidegi jańa tehnıkalar bir mezette birneshe jumysty atqarýǵa múmkindigi bar. Máselen, sý sepkish qurylǵysy bar avtokólik jaz mezgilinde kósheni sypyryp, ári sý seýip tazarta alady. Al, qystygúni muz ben qardy eritip tazalaıtyn qos múmkindigi bar. Osylaısha, birneshe jumysty atqaratyn 8 tehnıka endi kóne shahardyń tazalyǵy úshin qoldanylmaq. Olardy satyp alýǵa qazynadan jalpy somasy 189 mln teńge bólinip otyr. Kiltterdi tabystaý rásiminde qalanyń basshysy oblys ortalyǵy mártebesin alǵan Túrkistanǵa qoıylyp jatqan mindetterdiń biri qala tazalyǵy ekenin atap ótti.
«Búginde Túrkistan shahary burynǵy aýdan deńgeıindegi qala emes, oblystyń ortalyǵyna aınalǵan qala bolyp otyr. Osy baǵytta biz ben sizge júkteletin mindet pen talap óte joǵary. Túrkistan úshin qazirgi tańda eń ózekti másele qalanyń tazalyǵy, kóriktendirý men abattandyrý jumystary. Tazalyq jumysyn jandandyrý úshin oǵan qajetti tehnıkalyq jabdyqtardyń sanyn arttyrý negizgi mindetterdiń biri. Bul baǵytta qala ákimdigi tarapynan árdaıym alǵysharttar jasalyp otyrady»,-dedi Álipbek Óserbaev.
Sonymen qatar ákim oblys ortalyǵy Túrikstannyń zaman talabyna saı damý qarqynyn odan ári arttyrýǵa qajetti baǵyttardy jetildirýdi jáne qalanyń logıstıkalyq múmkindigin arttyrýdy, sondaı-aq týrızm ortalyǵy retinde damytý boıynsha naqty sharalardy júzege asyrýdy qolǵa alyp jatqandyǵyn jetkizdi. Aldaǵy ýaqytta jumys barysynda júkteletin mindet pen talap óte joǵary bolatynyn eskertti.
