Túrkistanǵa kóship kelgen jas mamandar shańyraq kóterýde
TÚRKІSTAN. QazAqparat - Túrkistan qalasynda oblys ortalyǵyna kóship kelip, otbasyn qurǵan jas mamandar Aqtóre Bolatuly men Araılym Erkinqyzy saltanatty túrde nekelerin qıdy. Aıtýly sharaǵa arnaıy qatysqan oblys ákimi Janseıit Túımebaev shańyraq kótergen jas otbasyn quttyqtap, syılyq tabystady, dep habarlaıdy QazAqparat.
«Elbasy Nursultan Nazarbaev Jarlyǵyn jarııalaǵan soń Túrkistan oblysynyń ákimdigi Túrkistan qalasyna kóshirildi. Osynda qyzmet jasap jatqan túrli basqarmalar men departamentterde qyzmet etip otyrǵan memlekettik qyzmetshilerdiń arasynan bir-birin taýyp, jas mamandar tuńǵysh ret shańyraq kóterip otyr. Bul da oblys úshin qýantarlyq jaıt. Otbasy - qoǵamnyń irgetasy, ajyramas bóligi. Elbasynyń «Otanǵa degen ystyq sezim jaqyndaryna, týǵan-týysqandaryna degen súıispenshilikten bastalady» degen sózi bar. Memleket basshymyz otbasyndaǵy tárbıege asa mán berip keledi. Jas jubaılardy zańdy nekelerimen quttyqtaımyn! Kótergen shańyraqtary berik bolsyn», - dedi aımaq basshysy.
Sonymen qatar, oblys ákimi jas otbasyǵa ákimshilik-iskerlik ortalyǵynda jańadan boı kóterip jatqan turǵyn úıden kezeksiz baspana alý sertıfıkatyn tabys etti.
