Túrkistanǵa kóship barǵan qyzmetkerlerge aı saıyn páteraqyǵa 81 myń teńgeden beriledi
TÚRKІSTAN. QazAqparat - Túrkistanǵa qonys aýdarǵan oblystyq Densaýlyq saqtaý basqarmasynyń qyzmetkerlerine materıaldyq kómek pen ystyq tamaq berilýde. Bul týraly búgin atalǵan basqarma basshysy Muqan Egizbaev BAQ ókilderimen kezdesý barysynda málimdedi, dep habarlaıdy QazAqparat.
Muqan Keńesbekulynyń sózinshe, basqarma qyzmetkerleri búginde Túrkistan qalalyq aýrýhanasy ǵımaratynyń birinshi qabatyna qonys tepken. Qazirgi tańda basqarmadaǵy kabınetter ınternetke qosylyp, telefon, kompıýterlermen jabdyqtalǵan. Al, qyzmetkerler Túrkistanǵa ornyǵyp, balalaryn mektepter men balabaqshalarǵa ornalastyryp jatyr.
«Túrkistan qalasyna qonys aýdarǵan Densaýlyq saqtaý basqarmasy qyzmetkerlerine páteraqy retinde aı saıyn 81 myń teńgeden beriledi. Qyrkúıek aıynan bastap ekologııalyq zııandy aımaq retinde jalaqylaryna 20 paıyz aqsha qosylady. Mamandardyń kóship-qonýyna baılanysty materıaldyq kómekti de jasap jatyrmyz. Budan bólek, tús mezgilinde bir mezgil ystyq tamaq tegin tamaq beriledi. Ondaı jaǵdaı basqa eshbir basqarmada joq. Sondaı-aq ákimdik tarapynan qoldaý kórsetilip, jergilikti tasymaldaýshy kompanııa senbi, jeksenbi kúnderi Shymkentke qaıtatyn qyzmetkerlerdi arzan baǵamen aparyp, dúısenbige deıin alyp keledi»,-dedi Muqan Egizbaev. 
Sonymen qatar, Túrkistanǵa qonys aýdarǵan qyzmetkerler úshin kópqabatty úılerdiń qurylysy júrip jatyr. Keler jyly bul baspanalar paıdalanýǵa berilgende Densaýlyq saqtaý basqarmasynyń mamandary da turǵyn úımen qamtylmaq.
