Túrkistanǵa Koreıa medıtsına ortalyǵynyń jumys toby keldi
TÚRKІSTAN. QazAqparat – Túrkistan oblysyna Koreıa medıtsına ortalyǵynyń jumys toby keldi. Kezdesý barysynda oblystyq Qoǵamdyq densaýlyq saqtaý basqarmasy basshylyǵy men Pýchon qalasyndaǵy Sýnchonhıan medıtsınalyq ortalyǵynyń professory, onkologııalyq ári halyqaralyq hırýrgtar qoǵamynyń resmı múshesi Kım Hen Chol arasynda eki jaqty yntymaqtastyq memorandýmyna qol qoıyldy, dep habarlaıdy QazAqparat tilshisi.
Memorandýmǵa sáıkes, oblystyń onkolog-dárigerleri jylyna eki ret Koreıa elinde biliktiligin arttyratyn boldy. Sondaı-aq túrkistandyq naýqastarǵa álemge tanymal medıtsınalyq ortalyqta tegin kómek kórsetiledi.
Aıta keteıik, professor Kım Hen Choldyń medıtsına salasynda jetken jetistikteri kóp. Ol Barselona Ispan medıtsınalyq ýnıversıtetiniń bas professory, Halyqaralyq Gepato-pankreato-Bıllıarlyq qaýymdastyǵynyń, Azııadaǵy endoskopııalyq jáne laparoskopııalyq hırýrgtar qoǵamynyń resmı múshesi. Joǵary bilikti dáriger ót tas aýrýy, ót shyǵarý joldary, baýyr obyry, uıqy bezi obyry, laparoskopııalyq operatsııalar, sút bezi obyry, endokrınologııalyq hırýrgııa, búırek jáne baýyr transplantatsııasy sııaqty kúrdeli emdeý men operatsııalaryn jasaıdy. Professor 2011 jyldyń maýsym aıynda Koreıada birinshi bolyp qan quıýsyz baýyr transplantatsııasy boıynsha josparlanǵan otany sátti ótkizgen. Professor Túrkistan qalasynyń Ortalyq qalalyq aýrýhanasynda ótken semınarǵa da arnaıy qatysyp, oblys dárigerlerimen baýyr obyryn emdeý boıynsha tájirıbesimen bólisti. Sońynan naýqastardy qabyldap, dárigerlik keńes berdi.
