Túrkistanǵa arnaıy kelgen Polsha elshisi qazaq halqyna alǵys aıtty
Túrkistanǵa Polsha Respýblıkasynyń Qazaqstan Respýblıkasyndaǵy Tótenshe jáne ókiletti elshisi Selım Hazbıevıch jumys saparymen keldi. Ol aldymen Túrkistan oblysy ákiminiń orynbasary Rashıd Aıýpovpen kezdesip, ekijaqty áriptestik jónindegi máselelerdi talqylady.
Rashıd Aıýpov elshige Túrkistan oblysyn damytý baǵytyndaǵy jumystardy baıandap, ekonomıkalyq baılanystar men áriptestikti nyǵaıtý jónindegi oılaryn aıtty. Túrkistanda ınvestıtsııa salýǵa qolaıly jaǵdaı jasalǵanyna toqtalyp, Polsha eliniń kásipkerleriniń qatysýymen bıznes-forým ótkizý jónindegi usynysyn jetkizdi.
Selım Hazbıevıch Túrkistan qalasynda oń ózgeristerdi ańǵarǵanyn aıtty.
– Shaharlaryńyzǵa ekinshi ret kelip turmyn. Damyp jatqany baıqalady. Polsha men Qazaqstan arasynda óte tyǵyz dostyq qarym-qatynas ornaǵan. Kásipkerlik salasyndaǵy baılanysty nyǵaıtýǵa da múmkindik bar. Bıznes-forým ótkizý týraly usynysyńyzdy qoldaımyn. Bul máselege arnaıy toqtalyp, júzege asyrýǵa kúsh salamyz, – degen elshi polıak pen qazaq halyqtary arasyndaǵy tarıhı sabaqtastyq jóninde oı qozǵady.
– Men birinshiden, qazaq halqyna alǵys aıtamyn. Túrkistanǵa kelýdegi basty maqsatym da – polıak halqynyń Qazaqstan jurtshylyǵyna degen ystyq yqylasy men alǵysyn jetkizý. Ótken ǵasyrdaǵy qıyn kezeńderde qazaq dalasyna myńdaǵan polıak azamaty kúshtep kóshirildi. Qazaq halqy olardy qushaq jaıa qarsy alyp, bir nandy bólisip jep, qamqorlyq tanytty. Túrkistan óńirinde de polıak halqynyń ókilderiniń zırattary bar. Osy tarıhı oryndardy tabýǵa kómektesip, bizdiń tarıhshylarmen tyǵyz baılanysta jumys atqarǵan azamattarǵa Polsha eliniń «Opiekun Miejsc Pamięci Narodowej» medalin tapsyrýǵa ruqsat etińizder, – degen ol.
Sondaı-aq, elshi ulttyq eskertkishterdi qorǵaýǵa úles qosqan Kentaý qalasynyń turǵyndary Rasylbek Ótkelbaev pen Saltanat Dúısenovany arnaıy marapattady.
Kezdesý barysynda Polshanyń elimizdegi Tótenshe jáne ókiletti elshisi Selım Hazbıevıchke Túrkistan oblysy atynan estelik syılyqtar tapsyryldy. Qonaqtar da estelik syılyǵyn usynyp, ekijaqty baılanysty tereńdete túsýge ýaǵdalasty.
