Túrkistandyqtyń úıinde úsh ǵasyrdan beri saqtalyp kelgen qola qazan mýzeıge berildi
Túrkistanda «Mýzeıge syı» aktsııasy ótti. «Áziret Sultan» memlekettik tarıhı-mádenı mýzeı-qoryǵynyń uıymdastyrýmen ótken dástúrli sharada ǵalymdar men tarıhshylar, mýzeıge janashyr qala turǵyndary 30-ǵa jýyq qundy muralardy tabystady.
Olardyń qatarynda ataqty ǵalym Shaıh Sýleıman Jamaldyń aýdarmasy boıynsha aýdarylǵan «Tafsır» kitaby, atadan balaǵa mura bolǵan ǵasyrlyq qazan, Temýrıdter memleketiniń Ámir Temir atymen 785-786 h.j. (1383-1385 jj.) jáne 832 h.j. (1428-1429 j.) Buhara aqsha saraıynda soǵylǵan fýlýsi, Qoqan handyǵynyń eki dana tamshy pishindi, bir dana sharshy pishindi monetalary, XVII ǵ. usaq saýda isinde aınalymynda júrgen tórtburysh pishindi mys aqshalar men Reseı patshalyǵynyń nýmızmatıkalyq jádigerleri, Qoja Ahmet ıAsaýı kesenesinde jerlengen Kárson Beknazaruly Tańybaı batyrdyń portreti, kózeshiniń móri bar.
Tańatarovtar áýleti alyp kelgen qoladan quıylǵan úsh ǵasyrlyq qazan kesenege kelýshilerdiń qyzyǵýshylyǵyn týdyrdy. Uldary men nemerelerin ertip, ózi bastap kelgen 75 jastaǵy Asylbek Tańataruly babalarynan jetken qımas murany ári qaraı kesene mýzeıinde turýyn jón sanapty.
«Bereke daryǵan qola qazannan qazaqtyń qanshama jaqsylary men jaısańdary dám tatqan, ári áýlettiń de yrysy men berekesi ispettes. Búgingi kúni babadan taraǵan urpaqtar úlken áýletke aınalyp, tamyry keńge jaıylǵan, bilimdi de bilikti, ımandy, elge eńbegi sińgen azamattarǵa aınalǵan»,-dedi Asylbek Tańataruly.
Aıta keteıik, qazirgi kezde mýzeıdiń qor saqtaý jáne esepke alý bóliminiń qorynda 24 558 dana kóne jádiger memlekettik tirkeýge alynǵan, onyń 13 640 danasy negizgi qor, 10 918 danasy ǵylymı kómekshi qor esebinde. Olardyń basym kópshiligi túpnusqadaǵy tarıhı qundy dúnıeler.
