Túrkistandyqtarǵa «Enbek.kz» portalynyń qyzmeti túsindirildi

TÚRKІSTAN. QazAqparat - Túrkistan oblysynyń Jetisaı aýdanynda eń tómengi jalaqyny kóterý máselesine arnalǵan otyrys ótti. Sharaǵa óńirlik Eńbek ınspektsııasy jónindegi basqarmanyń jáne aýdandardyń basshylary, kásiporyndar men mekemelerdiń jetekshileri, memlekettik eńbek ınspektory jáne BAQ ókilderi qatysty, dep habarlaıdy QazAqparat tilshisi.

QR Prezıdentiniń 2018 jylǵy 5 qazandaǵy «Qazaqstandyqtardyń ál-aýqatynyń ósýi: tabys pen jumys sapasyn jaqsartý» atty Joldaýyn oryndaý maqsatynda uıymdastyrylǵan jıynda turǵyndarǵa eńbek bırjasy men «Elektrondyq HR» jobasyna qosylý máselesi túsindirildi. «Enbek.kz» portalyna tirkelý men eńbek sharttaryn esepke alýdyń biryńǵaı qyzmeti týraly keń kólemde aqparattar berildi. Sondaı-aq, jıynda jergilikti atqarýshy organnyń halyq tabysynyń deńgeıin arttyrý boıynsha atqarylyp jatqan jumystary talqylandy.

Esterińizge sala keteıik, aǵymdaǵy jyldyń 1 qańtarynan bastap elimizdegi eń tómengi jalaqy kólemi 42500 teńge bolyp belgilendi. Osyǵan oraı Jetisaı aýdanynda ornalasqan 33 mekemeniń 508 qyzmetkeriniń jalaqysy 42500 teńgege teńestirildi. Qazirgi tańda ózge de kásiporyndar men mekemelerdegi eń tómengi jalaqy kólemin arttyrý maqsatyndaǵy jumystar júıeli túrde júrgizilýde.