Túrkistandyqtardyń 90 paıyzy turaqty jumyspen qamtylǵan
TÚRKІSTAN. QazAqparat - Túrkistan oblysynda «Eńbek» nátıjeli jumyspen qamtýdy jáne jappaı kásipkerlikti damytýdyń memlekettik baǵdarlamasy aıasyndaǵy jospar 2018 jyly 110,1 paıyzǵa oryndaldy. Bul týraly búgin oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Muhıt Otarshıev Óńirlik kommýnıkatsııalyq qyzmetinde ótken baspasóz jıynynda málim etti, dep habarlaıdy QazAqparat.
Byltyr baǵdarlama sheńberinde 63270 adamdy jumyspen qamtý sharalaryna qatystyrý kerek bolsa, jyl qorytyndysymen 69682 adam eńbekke ornalasyp, jospar 110,1 paıyzǵa artyǵymen oryndalǵan.
Turaqty jumyspen qamtylǵandardyń úlesi 89,5 paıyzdy qurady. Bul, respýblıka deńgeıinde joǵary kórsetkishterdiń biri. Jalpy, baǵdarlamany júzege asyrýǵa bólingen 12,8 mlrd teńge tolyǵymen ıgerildi.
2018 jylǵy jumystaryn qorytyndylaǵan basqarma basshysy atalǵan jumystar 3 baǵyt boıynsha júzege asyrylǵanyn aıtty.
«Baǵdarlamanyń birinshi baǵyty sheńberinde 7953 adamdy oqýǵa joldaý josparlanǵan. Olardyń qatarynda tehnıkalyq jáne kásiptik bilimi bar kadrlardy daıarlaýǵa Ulttyq biryńǵaı testileýden ótpegen jáne oqý oryndaryna túspegen mektep túlekteri, ıaǵnı 24 jasqa deıingi jastar da bar. Azamattardy qysqa merzimdi kásiptik oqýǵa joldaý barysynda aýylǵa birinshi kezektegi mamandyqtardy oqytý eskerilip, 2588 azamat «Ár aýylǵa óz sheberi» jobasy boıynsha oqýǵa joldandy. Ekinshi baǵyt jappaı kásipkerlikti damytý boıynsha 2313 adamdy qamtý josparlanyp, naqty 2425 adam qamtamasyz etildi. Úshinshi baǵyt halyqty jumyspen qamtýǵa járdemdesý jáne eńbek resýrstarynyń utqyrlyǵy arqyly eńbek naryǵyn damytý sheńberinde 58617 adam jumyspen qamtý sharalarymen qamtylǵan nemese jospar 112 paıyzǵa oryndaldy», - dedi Muhıt Baımuhanbetuly.
Óńirdegi jańadan ashylǵan jumys oryndarynyń 19822-si nemese 64 paıyzy - turaqty, 11179 orny 36 paıyzy ýaqytsha jumys oryndaryna jatady. 2018 jylǵa jumys berýshilerge sheteldik jumys kúshin jumysqa tartýǵa 265 kvota bólingen.
Sondaı-aq, Respýblıka boıynsha bólingen 1706 kvota negizinde oblysta 455 otbasy soltústik óńirlerge qonys aýdaryp, kvotamen, kóshý úshin berilgen sýbsıdııamen qamtamasyz etilýde. Qonys aýdarǵan 1768 adamnyń 845-i eńbekke qabiletti bolsa, 630-y jumyspen qamtylǵan, 8-i jeke kásippen aınalysady, al qalǵan 285 adam zeınetkerler men balalar.
2018 jyly jańa formattaǵy ataýly áleýmettik kómek 190,4 myń adamǵa kórsetiletin josparlanyp, qarjy qajettiligi 16,4 mlrd. teńgeni qurady. Onyń ishinde 8,0 mlrd. teńgesi respýblıkalyq bıýdjetten bólinip, tolyǵymen ıgerildi.
Oblysta 90 998 múmkindigi shekteýli azamat bar. 2018 jyly múmkindigi shekteýli azamattardy áleýmettik qoldaý maqsatynda 8,5 mlrd. teńge jumsalyp, ótken jylmen salystyrǵanda 1,3 esege ulǵaıdy.
