Túrkistandyqtar ýtılızatsııaǵa jiberetin kólikterdi «domıno» ádisimen tıep júr
ASTANA. QazAqparat - Ǵalamtor jelisinde eski kólikterdi bir júk kóligine tıep jatqan adamdardyń vıdeosy jarııalandy. Rolıktiń avtory ony «Túrkistanda eski kólikterdi qalaı satyp alady?» degen ataýmen shyǵardy, dep xabarlaıdy QazAqparat tilshisi.
Vıdeoda eski kólikterdi tıep jatqan er adamdardyń isten shyqqan avtomobılderli «domıno» ádisimen jınap júrgenin baıqaýǵa bolady. Sosyn krannyń kómegimen mashınalardy basyp, bes birdeı eski kólikti bir júk mashınasyna tıep júr. Arǵy jaǵynda taǵy bir partııa daıyn tur.
Aıta keteıik, qarashanyń 21-i kúni respýblıka boıynsha eski kólikterdi ýtılızatsııalaý baǵdarlamasy bastalǵan bolatyn. «ÓKM (óndirýshilerdiń keńeıtilgen mindettemeleri) Operatory» JShS basqarýshy dırektory Rýstam Temirbekovtiń aıtýynsha, jyldyń aıaǵyna deıin 10 myń kólikti qabyldaý jospary bar. Oǵan bıýdjetten kvota, ıaǵnı tıisti qarajat bólinip otyr. Baǵdarlama aıasynda 3,5 tonnadan aspaıtyn jeńil kólikter qabyldanady. Al ýtılızatsııalyq tólemniń kólemi avtomobıldiń texnıkalyq jaǵdaıyna qaraı belgilenedi. Tolyq komplektatsııasyna 150 000 teńge berilse, isten shyqqan kólikter úshin 48 000 teńge tólenedi. Qazirgi kezde respýblıka boıynsha 17 qalada qabyldaý beketteri jasaqtaldy.
Baǵdarlama aıasynda eski kólikti qabyldaý beketine deıin jetkizý qyzmeti qarastyrylmaǵan. Sondyqtan kólik ıesi ony óz kúshimen alyp kelýi tıis. Alaıda keıbir jerlerde eski kólikterdi jınap, birden qabyldaý beketine jetkizýge nıet bildirgen kásipkerler bar.
