Túrkistandyqtar mınıstr Birjan Nurymbetovke máselesin aıtty

TÚRKІSTAN. QazAqparat - «Nur Otan» partııasy Túrkistan oblystyq fılıalynyń «Open Space» formatyndaǵy Qoǵamdyq qabyldaý bólmesinde Qazaqstan Respýblıkasynyń Eńbek jáne halyqty áleýmettik qorǵaý mınıstri Birjan Nurymbetov turǵyndardy qabyldady.

Mınıstrge oblystyń 7 turǵyny jeke máseleleri boıynsha aryz-shaǵymdaryn aıtyp, kómek surady, dep habarlaıdy QazAqparat tilshisi.

Máselen, Kentaý qalasynyń turǵyny A.Ybyraıym ataýly áleýmettik kómek alýǵa qujat tapsyryp, úsh aıynyń aqshasyn ǵana alǵanyn aıtady. Alaıda búgingi tańǵa deıin belgisiz sebeptermen qalǵan aqshalaı kómegine qol jetkize almaı otyr eken. Sol sııaqty jeti balanyń anasy A. Júztaeva da ataýly áleýmettik kómek alýǵa qujattaryn tapsyrǵanymen, eki aıyna ǵana alǵanyn aıtyp aryzdandy. Mınıstr eki ananyń da talaptary oryndy ekenin aıta kele Túrkistan oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Á.Temirbaeva men Kentaý qalasynyń ákimdigine ataýly áleýmettik kómekpen ýaqtyly qamtý jóninde tapsyrma berdi.

Arystyq K.Imanbekova bolsa turaqty jumysqa ornalasa almaı júrgenin aıtyp shaǵymdandy. Mınıstr Arys qalasy ákimdigine K.Imanbekovany jumysqa ornalastyrý sharalaryn qolǵa alý jóninde tapsyrma berdi. Másele baqylaýǵa alyndy.

Túrkistandyq K.Tuńǵyshbaeva óz mamandyǵy boıynsha turaqty jumysqa ornalasý úshin talaı esikti tozdyrǵan. Alaıda másele sheshilmegen. Endi bul ananyń da janaıqaıy nazarǵa alynatyn boldy. Oǵan Túrkistan qalasy ákimdigi tarapynan qaladaǵy bos jumys oryndary týraly málimet berilip, jumysqa ornalastyrýdyń naqty qadamdary jasalady. «Eńbek» memlekettik baǵdarlamasy boıynsha da jumys usynylmaq.

Qoǵamdyq qabyldaýda ordabasylyq F.Áshirbaeva, saryaǵashtyq B.Bekmurzaeva, túrkistandyq M.Sársembaeva ataýly áleýmettik kómek máselesin qozǵady. Birjan Bıdaıbekuly turǵyndar tarapynan aıtylǵan máselelerdi muqııat tyńdady. Árbir aryz-shaǵymǵa keń kólemde jaýap berip, keńesin aıtty. Keı máselelerdiń sheshilýin baqylaýynda ustaıtyndyǵyn sóz etip, ákimdikter men mekeme basshylaryna tapsyrma berdi. Árbir shaǵymdanýshy týraly málimetti tirkep aldy.

«Qoǵamdyq qabyldaýǵa Túrkistan oblysynyń birneshe turǵyny keldi. Olardyń basym bóligi jumyspen qamtý, ataýly áleýmettik kómek, turǵyn úı máselesin qozǵady. Ataýly áleýmettik kómektiń ýaqtyly tólenbeýi jaıly da shaǵymdanǵandar bar. Búginde bıýdjet tarapynan Túrkistan oblysyna tıisti qarajat aýdarylyp, qazan aıynyń ataýly áleýmettik kómeginiń qarajaty tólenip jatyr. Jalpy Túrkistan oblysynda 103 myń otbasy, 500 myń adam ataýly áleýmettik kómekti alady. Keı jaǵdaıda turǵyndar osy kómektiń sharttary týraly tolyq bilmeıdi. Olarǵa keńes berildi. Sondaı-aq bos jumys oryndaryn usynatyn memlekettik baǵdarlamalar týraly da maǵlumat jetpegender bar. Óńirlerdegi jumyspen qamtý ortalyqtaryna baryp, maǵlumat alyp qana qoımaı, jumysqa ornalasýǵa bolady», – dedi mınıstr B.Nurymbetov.

Qoǵamdyq qabyldaýǵa kelgen azamattardyń shaǵymdary «Nur Otan» partııasy Túrkistan oblystyq fılıalynyń turaqty baqylaýyna da alyndy.