Túrkistandyqtar Memlekettik rámizder kúnin atap ótti
TÚRKІSTAN. QazAqparat - 4 maýsym - Qazaqstan Respýblıkasynyń Memlekettik rámizderi kúnine oraı Túrkistan qalasy ákimdigi men oblystyq Іshki saıasat basqarmasynyń uıymdastyrýymen saltanatty jıyn ótti, dep habarlaıdy QazAqparat.
Rámizder alańynda ótken merekege Túrkistan oblysy ákiminiń orynbasary Málik Otarbaev qatysyp, jurtshylyqty quttyqtady.
«Qurmetti túrkistandyqtar! Barshańyzdy oblys ákimi Ómirzaq Estaıulynyń atynan merekemen quttyqtaımyn. Osydan 27 jyl buryn Qazaqstan Respýblıkasynyń Memlekettik rámizderi qabyldanǵan bolatyn. Eýrazııa tórinde ornalasqan Qazaqstan táýelsiz el retinde óz Ánurany, óz Týy men Eltańbasy bar memleketter qataryna qosylyp, ulttyq qundylyqtaryn pash etti. Al 2007 jyly 4 maýsymda QR Memlekettik rámizderi týraly zań qabyldandy. Mine, sol ýaqyttan beri 4 maýsym Memlekettik rámizder kúni retinde atalyp keledi. Memlekettik rámizderdi qurmetteý - otanshyldyqtyń belgisi. Kezinde Túrkistannyń saıypqyrany Bekzat Sattarhanov Sıdneı tórinde chempıon atanyp, rámizderimizdi kúlli álemge tanytty. Mine, qazirgi jastar sol Bekzat batyrdaı namysty bolyp, elge qyzmet etýleri tıis. Barshańyzdy Memlekettik rámizder kúnimen quttyqtaımyn! Eltańbamyz máńgi jarqyrap, kók Týymyz máńgi jelbireı bersin», - dedi ol. 
Saltanatty jıynda kitap kórmesi ótip, aqyndar men ánshiler patrıottyqqa shaqyratyn shyǵarmalaryn oryndady. Tulpar mingen jigitter kók Týdy jelbiretip, Túrkistan turǵyndary men qonaqtaryna asqaq rýh pen jiger syılady.
Merekelik is-sharada «Asyl qazyna» ájeler ansambli, oqýshylardyń hor ujymy, «Semser», «Bolashaq» toptary men «Shabyt», «Bısultan» bıshiler toby óner kórsetti. Sonymen birge Túrkistan qalalyq Mádenıet úıiniń ónerpazdary men ózge de jas ánshiler án shyrqady.
Sarbazdar men «Jas sarbazdar» klýbynyń músheleri Memlekettik rámizderdi ortaǵa alyp shyǵyp, osy qundylyqtardy qurmetteý jóninde uran tastady.
Rámizder kúnine arnalǵan merekede Túrkistan qalasyndaǵy bilim uıalarynyń órenderi belsendi qatysyp, qala jastary fleshmob kórsetti. Aǵa býyn ókilderi men qala turǵyndary da rámizderdiń mańyzdylyǵy týraly oı qozǵady. Memlekettik rámizderdi qurmetteýge shaqyrǵan is-shara túrkistandyqtarǵa kóterińki kóńil-kúı syılap, otanshyldyq dáripteldi.
