Túrkistandyqtar memqyzmetterdi jańadan iske qosylǵan portaldan alýda

TÚRKІSTAN. QazAqparat – Túrkistan oblysynda memlekettik qyzmetterdi elektrondy formatta alý úshin jańa portal iske qosyldy. Qazirgi tańda óńirdiń jeke jáne zańdy tulǵalaryna elektrondy formatta 22 memlekettik qyzmet tolyq qoljetimdi, dep habarlaıdy QazAqparat.

Óńirlik kommýnıkatsııalar qyzmetinen málim etkendeı, qyzmet.iturkistan.kz geoaqparattyq portalynan qalaǵan qyzmet túrin alýǵa bolady.

«Atap aıtqanda, jer qatynastary, sáýlet, jumyspen qamtýdy úılestirý, aýyl sharýashylyǵy boıynsha qyzmetterdi elektrondy júıede paıdalanady. Bul qyzmetter ázirge Túrkistan, Kentaý, Arys qalalarynda onlaın kórsetiledi. Aldaǵy ýaqytta tolyq aýdandar osy júıemen qamtylatyn bolady.

Aıta keterligi, geoaqparattyq portaldyń qoldanylýy jáne fýnktsııalary jaıly Túrkistan qalasynyń jer qatynastary, sáýlet, jumyspen qamtýdy úılestirý, aýyl sharýashylyǵy salasynan tıisti mamandarǵa oqytý jumystary júrgizildi», - delingen aqparatta.

Portalda qyzmetterdi alý tártibi:1) Tirkelý/Avtorızatsııa; 2) Qyzmetti tańdaý; 3) Ótinish berý; 4) ETsQ qoıý; 5) Sheshimin alý.