Túrkistandyqtar lımon ósire bastady
ASTANA. QazAqparat - Túrkistan qalasyna qarasty Iassy aýyldyq okrýgindegi "Qanjigit" sharýa qojalyǵynyń jylyjaıynda lımon ósip tur, dep habarlaıdy qalalyq ákimdiktiń baspasóz qyzmeti.
2015 jyldyń jeltoqsan aıynda egilgen tsıtrýsty kóshetter osy jyldyń kúzinde ónim beredi eken. Osyndaı jańalyqpen bólisken "Qanjigit" ShQ agronomy B.Momynov: «Lımon 40-60 jyl ómir súretin ósimdik. Alǵashqy jemisin 2 nemese 3 jylda beredi. Óıtkeni bul baıaý ósedi. Sondyqtan lımon ósirýde asqan shydamdylyq qajet. Keıde osyndaı kútimmen banan, kıvı sııaqty tropıkalyq jemisterdi de júreksinbeı jylyjaılarda ósirýge bolatyn sııaqty», - dep jańashyl oılaryn jetkizdi.
B.Momynov lımon kóshetterine kútim jasaýdy jaqsy meńgergen. Arnaıy kýrstan dáris alǵan agronom 3 gektar jerge egilgen lımon aǵashynan aldaǵy ýaqytta mol ónim alýdy josparlap otyrǵanyn aıtady. 
Aıta keterligi, "Qanjigit" ShQ jylyjaı kásibin bastaǵanyna bes jyldan asqan. 3 gektar jerge qyzanaq pen qııar egip otyrǵan sharýa qojalyq ókiliniń aıtýynsha jylyjaı aýmaǵyn keńeıtip, ónim túrlerin kóbeıpek nıette. Búginde munda 30-ǵa jýyq aýyl turǵyndary jumyspen qamtylyp otyr.
