Túrkistandyqtar elimizdiń úzdik kardıologtaryna qaralýda
TÚRKІSTAN. QazAqparat - Túrkistan oblysyndaǵy ortalyq emhanada QR Prezıdenti is basqarmasy medıtsınalyq ortalyǵy aýrýhanasynyń kóshpeli toby óz jumysyn bastady. Óńir turǵyndaryn elimizdiń úzdik kardıologtary Raýza Sultanova men Jeńis Qozybaev, dáriger arıtmıolog Shalqar Smaǵulov pen travmatolog Jetpis Súleımenovter qabyldady, dep habarlaıdy QazAqparat tilshisi.
Túrkistan oblystyq densaýlyq saqtaý basqarmasynyń basshysy Muqan Egizbaevtyń bastamasymen kelgen bilikti mamandarǵa az ǵana ýaqyttyń ishinde júzge jýyq túrkistandyq qaralyp, keńes aldy. Olardyń arasynda em - domyn QR Prezıdenti is basqarmasy medıtsınalyq ortalyǵy aýrýhanasynda jalǵastyryp ne osy aýrýhanada ota jasatýǵa múmkindik alǵandary da bar.
Aıta keteıik, QR Prezıdenti is basqarmasy medıtsınalyq ortalyǵy aýrýhanasynyń joǵary sanattaǵy dárigerleri oblys turǵyndaryn eki kún boıy qabyldaýdy josparlap otyr.
